Xhudo, boksi dhe hendbolli: Sportet që i sollën suksese Kosovës në vitin 2019

Janë disa sporte që Kosovës në vitet e fundit i kanë sjell suksese të mëdha në arenën ndërkombëtare.

Njëri prej tyre mbetet xhudo, pasi medalje të shumta edhe këtë vit që e lamë pas erdhën nga ky sport.

Po ashtu edhe në boks Kosova qëndron mirë, ku nuk munguan medaljet.

Paraqitje historike kishte edhe Kosova U21 në hendboll, pasi morri pjesë në Kampionatin Botëror të zhvilluar në Spanjë.

Më poshtë i gjeni disa nga sukseset e këtyre sporteve.  

HENDBOLL

Hendbolli gjatë vitit 2019 arriti suksesin më të madh nga të gjithë sportet ekipore, kështu Kosova u kualifikuar në një kampionat botëror për herë të parë të sportit kosovar.

Ishte përfaqësuesja e Kosovës në hendboll tek Juniorët ajo e cila arriti të kualifikohet në kampionatit botëror “Spanja 2019”.

Paraqitja impresive me finalisten, Kroacinë, barazimi me Bahrejnin dhe fitorja me Australinë shënuan pjesëmarrjen e Kosovës në këtë kampionat.

Kosova për herë të parë në të gjitha sportet ekipore garoi në botëror. Pjesëmarrja natyrisht ishte fitore e madhe edhe politike për shtetin tonë.

Pos që djelmoshat nga Kosova garuan me superfuqi të sportit, ata mundësuan që shteti që nuk e njeh Kosovën, të shfaq dhe të respektojë flamurin tonë.

XHUDO

Si çdo herë edhe këtë vit, xhudistët tanë na bënë krenar në arenën ndërkombëtare.

Majlinda Kelmendi, Loriana Kuka, Nora Gjakova, Distria Krasniqi, Laura Fazliu, Akil Gjakova, të udhëhequr nga Driton Kuka ishin xhudistët që arritën të fitonin medalje të ndryshme në garat më të mëdha evropiane në sportin e xhudos.

Majlinda Kelmendi arriti të rikthehet nga lëndimi, kështu duke fituar medaljen e artën në kampionatin evropian dhe pikërisht për këtë ajo e cilëson vitin 2019, si një vit të suksesshëm për të.

Xhudistja tjetër, Nora Gjakova arriti ta fitoi medaljen e argjendtë në lojërat evropiane.

Sukseset e xhudistëve nuk ndalen me kaq, pasi që është edhe Loriana Kuka, ajo e cila ka arritur që gjatë vitit 2019, të fitoi medaljen e bronztë në Kampionatin Botëror Tokio 2019, si dhe medaljen e bronztë në Lojërat Evropiane Minsk 2019.

Pa dyshim që viti 2019 ishte i suksesshëm edhe për xhudisten tjetër, Distria Krasniqi, e cili arriti të stoliset me medalje të bronztë në kampionatin botëror.

Ndërsa sukses në vitin 2019, arriti edhe xhudisti tjetër, Akil Gjakova i cili u rendit në pozitën e pestë në Masterin e Xhudos “Qingado”.

BOKS

Kosova gjatë vitit 2019, u krenua edhe me sukseset e arritura në sportin e boksit, nga boskierët nga Kosova, e ku vlen të theksohet Kampionati Ballkanik i mbajtur në muajin dhjetor, në Turqi ku Kosova u rendit në pozitën e dytë me medalje të fituara, duke mbetur prapa Turqisë,e cila ishte nikoqire e këtij edicioni.

Donjeta Sadiku është boksierja kosovare e cila arriti suksesin më të madh vitin që po lëmë pas. Ajo fitoi medaljen e artë në Kampionatin Ballkanik “Antalya 2019”.

Përpos Sadikut, në këtë kompeticion suksese të mëdha arritën edhe boksierët tjerë nga Kosova.

Shpëtim Bajoku, Besart Pireva arritën të fitonin medaljen e argjendtë, ndërsa Patriot Behrami dhe Bashkim Bajoku u stolisën me medaljen e bronztë.

ATLETIKË

Tjetër sukses i arritur nga sportistët nga Kosova në vitin 2019, është edhe medalja e artë e fituar në pjesëmarrjen për herë të parë në Festivalin Olimpik Evropian për të rinj “Baku 2019”.

Ishte atleti nga Mitrovica, Muhamet Ramadani, ai i cili u rendit i pari në hedhjen e gjyles, në disiplinën 5 kilogram.

Këto ishin disa nga sukseset e sportistëve tanë në vitin 2019, shpresojmë që në vitin e ardhshëm, Kosova të sigurojë kualifikimin në Kampionatin Evropian, e sportistët tanë të jenë në podiumet e garave në Lojërat Olimpike “Tokyo 2020”. /KP/