Xhihadisti nga Kosova që lufton për ISIS-in, zbulohet dosja sekrete

Një dezertor i ushtrisë së Shtetit Islamik, ka arritur të shkëputet nga grupi terrorist duke siguruar dosjen e plotë të 22 mijë luftëtarëve ISIS-it.

Këto dosje, mësohet se janë përpiluar nga Administrata e Përgjithshme e Kufirit të Shtetit Islamik.

Nga verifikimi i 1700 dokumenteve në 22 mijë dosje në total të luftëtarëve të ISIS-it rezultojnë edhe 25 shtetas shqiptarë dhe 23 të tjerë nga Kosova.
“ABC News” ka arritur të sigurojë një kopje të dosjes së plotë të një luftëtari nga Kosova, i cili është bërë pjesë e shtetit islamik më 29 korrik të 2013.

Në këtë formular që shihni, i përbëre nga 23 pyetje, është shkruar në gjuhën arabe dhe nga përkthimi, rezulton se aty jepen të dhënat personale të çdo pjesëtari të ISIS-it.

Por për shkak të sensitivitetit të informacionit, disa elemente janë fshehur për të mbrojtur privatësinë e familjes së xhihadistit, përcjellin mediat shqiptare.

Për ketë arsye, emri, datëlindja dhe numri i telefonit janë fshehur.

Bëhet fjalë për luftëtarin me nofkën “Abu Suleyman”, i biri i Faridas, i cili është regjistruar si Shqiptar por që jetonte në Kosove.

Abu Suleyman ka qenë i martuar, ka pasur një fëmijë dhe ka punuar si bojaxhi në Kosovë.

Nga formulari mësohet që Abu Suleyman ka mbaruar shkollën e mesme dhe ka vetëm njohuri elementare të fesë islame. Po ashtu xhihadisti shqiptar ka tipin e gjakut “O” pozitiv dhe nuk ka udhëtuar asnjëherë jashtë Kosovës.

Në pyetjen nëse Abu Suleyman preferon të jetë një luftëtar, kamikaz, punëtor apo studiues i Kuranit, ai ka zgjedhur të jetë luftëtar.

Formulari përfundon me adresën e banimit që është qyteti sirian Tal Rifat dhe që është regjistruar në korrik të 2013.

Sipas këtij dokumenti, të vënë në dispozicion nga dezertori i ISIS-it, tregon se çdo shtetas që i bashkohet shtetit islamik duhet të plotësoje këtë formular duke ju përgjigjur 23 pyetjeve.

Nga verifikimi i tyre rezulton se Shtetit Islamik, i janë bashkuar 22 mijë luftëtare që vijnë nga 51 kombësi të ndryshme, mes tyre edhe shqiptarë.