Wilder për duelin ndaj Joshuas: Ne erdhëm të pamë, por ti vazhdon të ikësh

Kampioni i WBC-së, Deontay Wilder, ka thënë se është i gatshëm të ndeshet me Anthony Joshuan dhe se është i hapur për t’i nisur bisedimet për meçin e shumëpritur duke shtuar se gjithçka varet nga britaniku.

TMZ e ka pyetur amerikanin në lidhje me komentet e mëhershme të AJ, i cili kishte thënë se ‘Bomberi i Bronztë’ duhej t’i bënte ofertë atij nëse dëshiron që dueli të ndodhë.

Lexo po ashtu Të gjitha lajmet nga Deontay Wilder

“E kemi bërë pesë herë. Dhe ata më kanë refuzuar! Prandaj, nuk dua ta dëgjoj duke thënë ‘duhet të vijë të më takojë mua’, sepse erdhëm dhe të pamë, e ti vazhdon të ikësh!”.

“Tash dëshiron që unë të vij dhe të të takoj? Jo. Tash është me kushtet tona. Do të vijmë të të takojmë atëherë kur do të duam të vijmë”, ka deklaruar Deontay.

Joshua është kampion i WBA, WBO, IBF e IBO, mirëpo që nga dueli me Wladimir Klitschko (2017) nuk ka pasur ndonjë kundërshtar të nivelit të Wilder.

Ai ka mposhtur emra, si Carlos Takam, Joseph Parker e Alexander Povetkin, ndërsa më 1 qershor do të debutojë në Amerikë kundër Andy Ruiz Jr. /Telegrafi/