WBA e detyron Joshuan të ndeshet me Povetkin, meçi ndaj Wilder shtyhet për vitin tjetër

Anthony Joshua duhet t’i lë anash planet për meçin ndaj Deontay Wilder, pasi WBA po e detyron të nënshkruajë kontratë brenda 24 orëve për mbrojtje obligative të titullit kundër Alexander Povetkin.

Që nga triumfi i britanikut kundër Joseph Parkerit në muajin mars, është duke u folur për superduelin eventual ndërmjet tij dhe boksierit amerikan, i cili është kampion në WBC.

Madje, dy boksierët kanë arritur marrëveshje bazë që përballja ndërmjet tyre të zhvillohet gjatë këtij viti.

Lexo po ashtu Lajmet për Anthony Joshuan

Megjithatë, WBA tash është duke e detyruar Joshuan që të zhvillojë meçin e detyruar për mbrojtjen e këtij titulli kundër sfiduesit Povetkin.

“Sot (e martë), WBA ka kërkuar përgjigje nga ekipi i Anthony Joshuas në lidhje me duelin ndaj sfiduesit të detyruar, Alexander Povetkin”.

“WBA ka lejuar rreth një muaj bisedime me Povektinin, si edhe bisedimet e stërzgjatura me Deontay Wilder”.

“Duket se ekipi i Wilder nuk e ka kthyer kontratën për meçin, prandaj ne po kërkojmë një datë për duelin ndërmjet Joshuas dhe Povetkinit që hy menjëherë në fuqi”, ka deklaruar kreu i WBA, Gilberto Mendoza.

Pritet që meçi ndërmjet AJ dhe Povetkin të zhvillohet në muajin shtator në Londër. Në këtë mënyrë do të shtyhet përballja ndaj Wilder për vitin 2019. /Telegrafi/