Vuçiq flet në emër të Ballkanit Perëndimor: Duhet të bashkohemi ekonomikisht

Presidenti serb, Aleksandër Vuçiq në një opinion të publikuar në Politico, të cilin e titullon ‘Ballkani Perëndimor duhet të heqë barrierat tregtare’, thotë se qarkullimi i lirë i mallrave, shërbimeve, njerëzve dhe kapitalit do ta bëjë rajonin tonë më tërheqës për investime, shkruan Telegrafi.

Shkrimi i Vuçiq dominohet nga termi Ballkani Perëndimor dhe nga një frymë avokimi për rajonin tonë. Serbia përmendet vetëm një herë, duke na ofruar kështu një qasje më të gjerë të Vuçiç të paktën në mënyrën si do të prezantohet.

Ai e nis me të shkuarën e afërt të luftërave, vrasjeve dhe përçarjes rajonale për të ardhur te realiteti i tanishëm i afrimit dhe komunikimit.

“Ne vendosëm të mësojmë nga gabimet e së shkuarës. Ne vendosëm që të parët janë vendet dhe njerëzit tanë. Ne duhet ta festojmë këtë arritje. Por duhet gjithashtu të njohim se ka ende shumë punë për të bërë. Tani që Ballkani Perëndimor është i bashkuar në ambicien tonë për t’u bërë pjesë e BE-së që së fundmi ka publikuar një strategji për rajonin – ne kemi një mundësi unike”, shkruan Vuçiq.

Sipas tij, Evropa po kupton rëndësinë dhe vlerën e biznesit me vendet e rajonit tonë dhe për këtë ka disa të dhëna – gjatë 10 viteve të fundit, tregtia ndërmjet Ballkanit Perëndimor dhe BE është dyfishuar, duke arritur në 44 miliardë euro në 2016, me eksportet në BE duke u rritur nga 7 miliardë në 18 miliardë euro.

“Por, ndërkohë që kompanitë evropiane gjithnjë e më shumë po shohin vlerën e bërjes së biznesit në Ballkanin Perëndimor, investimet private ende mbeten shumë prapa. Në të vërtetë, investimet ndërkufitare në Ballkanin Perëndimor janë katër herë më të ulëta se në BE”, shkruan ndër të tjera Vuçiq.

Vuçiç vlerëson si të ulëta investimet private, si problem papunësinë e rinisë çka sugjeron si rrugëdalje optimale duke krijuare një treg të përbashkët mes vendeve të Ballkanit Përendimor.

Sipas tij, tregu i përbashkët rajonal do të sillte 8 deri 9 miliardë dollarë investime vjetore krahasuar me 4.6 miliardë që është aktualisht.

“Krijimi i një tregu të përbashkët midis vendeve të Ballkanit Perëndimor do të dyfishonte nivelin aktual të investimeve të huaja direkte dhe do të sillte të paktën 8 – 9 miliardë dollarë në investime në vit, krahasuar me 4.6 miliardë dollarë të vitit të kaluar. Do të krijonte mijëra vende të reja pune dhe do t’i bënin ekonomitë tona më konkurruese”, shkruan ai.

“Kjo do të shërbente si pikë konvergjence mes vendeve të Ballkanit Perëndimor”, shkruan Vuçiç, sipas të cilit tregu rajonal i përbashkët do të frenonte edhe emigrimin masiv të njerëzve.

“Historia tregon se bashkimi ekonomik është kyç për stabilitetin politik”, vijon ai.

Sipas tij CEFTA është gur themeli i një procesi që duhet përmbyllur me krijimin e tregut të përbashkët.

“Ne hodhëm themelet për një integrim më të ngushtë ekonomik rajonal në Ballkanin Perëndimor, kur u bashkuam me homologët tanë të Evropës Qendrore dhe Lindore në CEFTA. Tani ne duhet ta bëjmë unitetin ekonomik një realitet duke krijuar një treg të përbashkët”, shkruan ai.

Çështja e tregut të përbashkët nuk është mbështetur nga Qeveria Mustafa dhe ajo e Malit të Zi, por është mbështetur nga qeveria shqiptare. /Telegrafi/