Vrima në mur për duhanpirës

Për t’i ruajtur klientët edhe përkundër ndalimit të duhanit, shumë pronarë të lokaleve do të bëjnë çdo gjë që munden, që t’u dalin në ndihmë duhanpirësve. Nëse nevojitet edhe të hapin ndonjë vrimë në mur, që së paku dorën ta qesin jashtë.

Pronari i një restorantit në Gjermani, ka evituar ndalimin e pirjes së duhanit duke hapur një vrimë në mur, që klientët e tij të mund të qesin dorën jashtë për të ndezur duhanin.

Michael Windisch, pronar i restorantit Maltermeister Turm në Goslar, ka hapur tri vrima afër tavolinave në restorantin e tij, pasi që autoritetet lokale kanë ndaluar pirjen e duhanit në restorante dhe vende ku shërbehet ushqimi.

Klientët që dëshirojnë të pinë duhan, mund të fusin dorën në mur dhe të ndezin cigaren. Përtej vrimës është e vendosur një perde për të ndaluar ajrin të futet brenda.

”Tani klientët e mi mund të kënaqen me cigaret e tyre në mënyrë të ligjshme, e jo të largohen nga restoranti”, ka thënë Windisch.

Patentën e tij pas 1 janarit, kur do të hyjë në fuqi ndalimi i duhanit në vendet publike, do ta marrin shumë kolegë të tij.