Vrasja në Gjilan, Haradinaj mohon që polici ishte pjesë e mbrojtjes së tij – “dikush po bën propagandë qëllimshëm ndaj meje”

Një pjesë e mediave raportuan se polici V. H., që vrau një qytetar sot në Gjilan, ishte pjesë e ekipit të mbrojtjes së afërt së Haradinajt.

E për këtë ka reaguar kryeministri në detyrë, Ramush Haradinaj.

Përmes një shkrimi në Facebook, ai e ka mohuar se polici që kreu vrasjen në Gjilan ishte pjesë e mbrojtjes së afërt të tij.

Haradinaj thotë se qëndrimi i palëkundur kundër ndarjes së Kosovës dhe kundër pazareve të errëta të këmbimit të territoreve, po vazhdon t’i pengojë shpifësve dhe propaganduesve, që në emër të informimit, qëllimshëm shpërndajnë dezinformata dhe të pavërteta, duke etiketuar emrin e tij.

Lexo po ashtu Zyra e Kryeministrit dënon vrasjen në Gjilan

“Përkundër që ne e dënuam vrasjen e një qytetari nga ana e një polici, bëmë thirrje për organet e rendit që të ndërmarrin veprimet e nevojshme ligjore dhe sqaruam që polici në fjalë, asnjëherë nuk ishte pjesë e ekipit tim të mbrojtjes së afërt, disa mediume, të shtyrë nga propaganda e politikës së ndarjes, vazhdojnë ta etiketojnë dorasin si person të afërt me emrin tim”, shkruan Haradinaj.

Ai ka theksuar se përkundër tentimit për njollosje me qëllim, s’do të mund të ndalin idenë që ‘ta mbrojmë Kosovën nga copëtimi dhe nga pazaret e një grusht profetësish’.

“As kjo përpjekje dhe as njollosjet e mëhershme dhe as të tjerat që mund të vijnë, nuk do të na ndalin, që në çfarëdo detyre institucionale, ta mbrojmë Kosovën nga copëtimi dhe nga pazaret e një grusht profiterësh. Kosova do të jetë ajo e 17 shkurtit, për të cilën dhanë jetë luftëtarët tanë, sakrifikuan nënat dhe familjet tona, intelektualët tanë dhe çdo shqiptar”, ka shkruar në fund Haradinaj.

Më herët, lidhur me rastin në Gjilan, zyra e Kryeministrit të Kosovës, ka duar vrasjen e një qytetari të Kosovës, nga pjesëtari i Policisë. Me këtë rast, Zyra e Kryeministrit, ka ftuar organet e rendit që të ndërmarrin të gjitha veprimet për të identifikuar shkakun dhe për të marrë vendimet e duhura, deri në ndriçimin e plotë të rastit. /Telegrafi/