Veseli premton ndërtimin e 300 çerdheve për një mandat

Kadri Veseli i cili pretendon të jetë shef qeverie për katër vjet të ardhshme, ka premtuar se për një mandat do të ndërtojnë rreth 300 çerdhe në tërë Republikën e Kosovës.

Kandidati për kryeministër nga Partia Demokratike e Kosovës, u ka premtuar mësimdhënësve përmirësim të sistemit arsimor në vend.

Kreu i PDK-së ka takuar sot mësimdhënësit të cilëve u tha se janë partnerët më të çmuar në procesin e zhvillimit te ardhshëm.

Në takimin me mësimdhënës, Veseli premtoi se të rinjtë nuk do të mbesin pa punë, por do të jenë të integruar në tregun e punës që të gjithë.

“Mendojmë dhe do t’i realizojmë, që në këtë mandat të ndërtojmë të paktën 300 çerdhe në gjithë Republikën e Kosovës”, tha ai.

Veseli tha se nëse arrihet të fuqizohet sistemi arsimor duke e bërë kmpaktibil me kërkesat e ekonomisë së tregut, atëherë do të jetë sukses i madh.

Ai tha se PDK çdoherë ka qëndruar përkrah mësimdhënësve dhe sipas tij, sistemi arsimor në vend nuk ka pasur partner tjetër.

Ai premtoi se edhe për katër vjet të ardhshme do të jetë përkrah tyre, që siç tha ai, jo vetëm deri më ditën e zgjedhjeve, por çdo ditë tjetër pas 6 tetorit.

“Nuk ka pas partner sistemi ynë arsimor më shumë se Partinë Demokratike të Kosovës, unë u pyes edhe publikisht, kujt ia keni pa hajrin më së shumti sesa Partisë Demontime të Kosovës që 20 vite në sistemin tuaj arsimor? Kush ka qenë më afër jush? Kush i ka përmirësuar, kush u ka larguar nga barakat? Do të jem përkrah jush, do të jem me ju edhe për katër vitet e ardhshme, do të jem vërtetë më ju jo vetëm më 6 tetor, por u jap fjalën do të jem çdo ditë të jetës që na jep Zoti për katër vitet e ardhshme, duke përkrahur bashkërisht. Kemi nevojë për përkrahjen e juaj, Kosova ka nevojë për kontributin tuaj dhe bashkë mund të ja arrijmë dhe do të kemi sukses, për arsye se kemi vetëm një rrugëtim, e ai rrugëtim është Kosova euroatlantike, Kosova e dijes, e prodhimit, Kosova e ndërmarrësisë, e promotor të këtij ndryshimi e zhvillimi të madh, epokal të Kosovës për katër vitet e ardhshme, jeni ju edukatorët, profesorët, arsimtarët”, tha Veseli.

Para mësimdhënësve ka folur edhe nënkryetari i PDK-së, Enver Hoxhaj.

Ai tha se prioritet për Kadri Veselin në postin e kryeministrit do të jetë rritja e numrit të mësimdhënësve dhe zvogëlimi i nxënësve në klasë.

“Rritja e numrit të mësimdhënësve dhe zvogëlimi i nxënësve në klasë, do të jetë prioritet i kryeministrit Veseli. Shkolla duhet ta ketë në qendër nxënësin, mirëpo në qendër të nxënësit duhet të jetë marrja e aftësive, e shkathtësive, të cilat do t’i shërbejnë atij në një ekonomi e cila po ndryshon”, tha ai.

Ai tha se me Veselin kryeministër, në të gjitha shkollat e Republikës së Kosovës të ketë mësimin gjithëditor.

Sipas tij, rritja e hapësirës shkollore dhe rritja e pagave, do të ketë kuptim vetëm atëherë kur të rritet hapësira kohore për qëndrimin e nxënësve në shkollë, raporton KosovaPress. /Telegrafi/