Vendimi për pronën e Manastirit, Ramosaj: Deçani u godit përsëri padrejtësisht

Kryetari i Deçanit, Bashkim Ramosaj, e ka cilësuar si ‘goditje të padrejtë’ për komunën që udhëheqë, vendimin e Qeverisë së Kosovës për të urdhëruar Agjencinë Kadastrale të zbatojë vendimin e Gjykatës Kushtetuese që t’ia njohë Manastirit të Deçanit të drejtën në pronë në 24 hektarë.

Përmes një postimi në Facebook, Ramosaj ka thënë se “Deçani përsëri goditet padrejtësisht, kësaj radhe nga një Urdhër Ekzekutiv i Kryeministrit të Republikës së Kosovës, z. Albin Kurti!”.

Lexo po ashtu Qeveria i kërkon Agjencisë Kadastrale të Kosovës zbatimin e vendimit të Kushtetueses për Manastirin e Deçanit

“Deçani së pari është goditur padrejtësisht në vitin 2008, kur u krijua “Zona e Veçantë e Mbrojtur”, e cila bëri ndalimin e plotë dhe kufizimin e pajustifikueshëm në: ndërtimin e rrugës, ndërtimin e shtratit të Lumbardhit, në ndalimin e shfrytëzimit të ‘Pushimores së Fëmijëve’, e ndaloj plotësisht zhvillimin ekonomik dhe ndërtimin në prona private brenda kësaj zone”.

“Parku Kombëtar ‘Bjeshkët e Nemuna’ të vitit 2012, i cili e ndaloi dhe kufizoi mundësinë për të jetuar më mirë në këtë qytet, mundësinë e zhvillimit të kësaj komune, implementimin e shumë projekteve strategjike, të cilat tani më është dashur të jenë të përfunduara. Park Nacional i cili është bërë pengesë shtesë e zhvillimit ekonomik. Vendimi për fillimin e bypass-it, ndërrimin e destinimit të rrugës R108 – viti 2014”, ka shkruar kryetari i Deçanit.

Ai tutje ka thënë se vendimi i Gjykatës Kushtetuese i vitit 2016 për pronat e Manastirit të Deçanit është zbatuar sot, nga Agjencia Kadastrale e Kosovës me urdhëresë të Kryeministrit.

“Qe tri vite po pres që ky Kryeministër të më takoj një herë të vetme, për të diskutuar edhe për këtë temë për të cilën dha Urdhër Ekzekutiv sot! ‘Kur nuk je i zoti të bësh një hajr në këtë vend, është mirë të mos i bësh as sherr këtij vendi’!”, ka shkruar më tej Ramosaj. /Telegrafi/