Varis Xhejlani merr besimin për mandatin e tretë në krye të shoqatës “Esnaf”

Bordi i ri Drejtues i shoqatës së biznesmenëve dhe zejtarëve “Esnaf”, në mbledhjen e tij të parë, njëzëri ka rizgjedhur Varis Xhejlanin për kryetar.

Sipas njoftimit ai ka qenë kandidati i vetëm për këtë detyrë.

“Në mbledhjen e Bordit Drejtues të shoqatës “Esnaf”, z.Varis Xhejlani u zgjodh unanimisht kryetar i shoqatës edhe për një mandat, si kandidati i vetëm për këtë detyrë me përgjegjësi. Zëvendëskryetarë u zgjodhën z.Sali Salah dhe z.Albin Kabashi”, thuhet në njoftimin e shoqatës “Esnaf”, raporton Telegrafi.

Ky është mandati i tretë i Xhejlanit në krye të “Esnafit”.

Pas rizgjedhjes, Xhejlani ka shprehur mirënjohjen për besimin e dhënë duke u zotuar se do të vijojë të udhëheqë shoqatën drejt përmbushjes së misionit dhe vizionit të saj.

“Të nderuar miq, me nder dhe përgjegjësi marr detyrën si kryetar i shoqatës “Esnaf” për mandatin e tretë. Faleminderit për mbështetjen tuaj!”, është shprehur ai, raporton Telegrafi.

Bordi i ri Drejtues i shoqatës së biznesmenëve dhe zejtarëve “Esnaf” është zgjedhur në Kuvendin e rregullt të mbajtur me 23 shkurt 2025 në Shtëpinë e Kulturës “Xhemajli Berisha” në Prizren.

Lexo po ashtu Mbahet Kuvendi i rregullt i shoqatës “Esnaf”, zgjedhet Bordi i ri Drejtues

Qëllimi i shoqatës “Esnaf” është që të mbështes bizneset dhe zejtarët për zhvillimin e mëtejmë të tyre, si dhe të mundësoj pjesëmarrjen efektive të tyre në mekanizmat e vendimmarrjes, duke promovuar bashkëpunimin dhe iniciativat që forcojnë zhvillimin ekonomik. /Telegrafi/