Valencia përfshihet në garë për Pjacan

Fiorentina akoma nuk ka arritur marrëveshje me Juventusin për Marko Pjaca, ndërkohë që klubet kanë nisur t’i bëjnë konkurrencë.

Mediat italiane raportojnë se Valencia ka shprehur interesim për futbollistin kroat.

Anësori i Bianconerëve pritet të largohet gjatë kësaj vere, ndërsa Viola është klubi më i interesuar për shërbimet e tij.

Megjithatë, në ditët e fundit bisedimet kanë ngecur, sepse Fiorentina dëshiron ta huazojë lojtarin ‘me opsion blerjeje’, teksa Juve dëshiron ta japë në huazim ‘me detyrim blerjeje’, si edhe ta përfshijë mundësinë e riblerjes.

Në ndërkohë, Tuttosport bën të ditru se Valencia e ka rikthyer interesimin për Pjacan dhe raportet ndërmjet dy klubeve janë shumë të mira.

West Ham Unitedi ka shprehur po ashtu interesim për 23-vjeçarin, edhe pse së fundmi e ka angazhuar Felipe Andersonin.

Lexo po ashtu Lajmet për PJACAN

Pjaca u transferua te Juventusi me shumë bujë në vitin 2016 nga Dinamo Zagrebi, me ç’rast Bianconerët shpenzuan 23 milionë euro për të.

Mirëpo, në tetor të vitit 2016 pësoi një frakturë në këmbë gjatë kohës sa ishte me kombëtaren, teksa në mars të vitit 2017 e lëndoi ligamentin kryesor të gjurit, po ashtu gjatë angazhimit me Kroacinë duke qëndruar një kohë të gjatë jashtë fushe.

Në këtë mënyrë, ai mbeti jashtë planeve të Massimiliano Allegrit, ashtu që pritet të largohet nga Juventusi. /Telegrafi/