Valbon Krasniqi: Situata me COVID-19 më e qetë, por fundi i pandemisë duket se nuk është afër

Infektologu Valbon Krasniqi, njëherësh ushtrues i detyrës së Drejtorit të Përgjithshëm të Shërbimit Spitalor Klinik Universitar të Kosovës, ka thënë që situata me pandeminë, gjatë javëve të fundit është normalizuar.

“Jemi dëshmitar që këto 3 javët e fundit në Kosovë, kemi numër më të vogël të rasteve të të infektuarve; poashtu, kemi edhe numër të vogël të pacientëve që janë të shtrirë nëpër spitalet e përgjithshme edhe në klinikat e QKUK-së në Prishtinë”, tha Krasniqi në Klan Kosova.

Krasniqi ka thënë që për këtë arsye nga sot janë rikthyer shërbimet shëndetësore.

“Duke parë këtë trend pozitiv, sa i përket epidemisë në vendin tonë, ne menduam që tani kemi momentin e favorshëm që të rikthejmë shërbimet shëndetësore, të cilat i kanë munguar për një kohë të gjatë qytetarëve tonë”.

“Tashmë ne kemi hyrë në muajin e  shtatë; kaluam gjashtë muaj që nga fillimi i panedmisë në Kosovë dhe ne kemi për obligim që të ofrojmë shërbime edhe për pacientët tjerë. Qytetarët kanë hasur në vështirësi serioze për të marrë shërbimet tjera”.

“Urojmë dhe presim që kjo të mos na përsëritet në Kosovë. Përjetuam periudha shumë të rënda, sa i përket menaxhimit të pandemisë. Kishim kërkesa të mëdha për trajtim spitalor dhe mbingarkesë të skajshme të spitaleve tona, gjatë muajit gusht kishim mbi 650 paceintë të shtrirë”, ka thënë Krasniqi.

Krasniqi ka theksuar që respektimi i masave nga ana e qytetarëve sjell rezultate.

“Tash që kanë filluar shkollat ka më shumë ekspozim të njerëzve, kjo shtohet me mundësitë të kontakteve të shpeshta dhe mundësi të përhapjes së infeksionit”.

“Nëse kthehemi prapa, Kosova kritikohej shumë për numrin e madh të rasteve edhe të infektuarve edhe të vdekurve. Kjo u pa që ishte një martaonë.

“Duhet ta shohim si një proces që ka një fillim, por ka edhe një fund i cili nuk po duket që është afër. Nga faza që e kaluam në korrik dhe në gusht, tash kemi situatën më të qetë. Duhet ta shohim në tërësi si proces e jo në periudha të ndara”, tha Krasniqi.