Ushtria izraelite ka pranuar se ushtarët e saj kanë bërë gabim në incidentin e 23 marsit që vrau 15 punonjës të urgjencës në Gazën jugore.
Një autokolonë e ambulancave të Shoqatës së Gjysmëhënës së Kuqe Palestineze (PRCS), një automjet i OKB-së dhe një kamion zjarri i Mbrojtjes Civile të Gazës u vunë nën zjarr pranë Rafah.
Izraeli fillimisht pretendoi se ushtarët hapën zjarr sepse kolona po afrohej "në mënyrë të dyshimtë" në errësirë, pa drita apo sinjale.
Megjithatë, pamjet e marra nga një prej punëtorëve të vdekur tregojnë se automjetet i kishin ndezur dritat teksa iu përgjigjën thirrjes për ndihmë për të plagosurit, shkruan BBC, përcjell Telegrafi.
Forcat e Mbrojtjes së Izraelit (IDF) pretendojnë se të paktën gjashtë ndihmës mjekësorë ishin të lidhur me Hamasin, por ende nuk kanë dhënë prova për këtë.
Ata pranuan se ishin të gjithë të paarmatosur kur filluan të shtënat.
Pamjet, të publikuara fillimisht nga New York Times, tregojnë automjete që tërhiqen përpara se të shtënat të fillojnë pa paralajmërim.
IDF tha se ushtarët kishin qëlluar më parë në një automjet që transportonte tre anëtarë të Hamasit.
Kur mbërritën ambulancat, ushtarët supozuan se ishin nën kërcënim dhe hapën zjarr, pavarësisht se nuk kishte prova që punonjësit e urgjencës ishin të armatosur.
Raportohet se trupat e 15 punëtorëve të vdekur u varrosën në rërë për t'i mbrojtur nga kafshët e egra, ndërsa automjetet u zhvendosën dhe u larguan të nesërmen për të pastruar rrugën.
Ndryshe, incidenti ka nxitur thirrje nga organizatat ndërkombëtare, duke përfshirë Gjysmëhënën e Kuqe, për një hetim të pavarur.
Ushtria izraelite ka premtuar një "hetim të plotë" për të kuptuar sekuencën e ngjarjeve dhe mënyrën se si u trajtua situata. /Telegrafi/
