Tre të akuzuarve për vrasjen e Ivanoviqit iu vendoset masa e arrestit shtëpiak pas 40 muajve paraburgim

Nedejklo Spasojeviq, Marko Roshiq, Rade Basara – për vrasjen e politikanit serb, Oliver Ivanoviq nuk do të qëndrojnë më në paraburgim pasi sot iu është ndërruar masa në arrest shtëpiak.

Kjo ka ndodhur në Gjykatën Themelore në Prishtinë, ku Trupi gjykues i kryesuar nga Valon Kurtaj ka vlerësuar se pas periudhës prej 40 muajve paraburgim t’ua zëvendësojë masën me arrest shtëpiak, raporton “Betimi për Drejtësi”.

Të akuzuarit Nedejklo Spasojeviq, Marko Roshiq, Rade Basara dhe Silvana Arsoviq ngarkohen  se në bashkëpunim edhe me të pandehurit që janë në arrati Zheiko BojiQ, Zvonko Veselinoviq dhe Milan Radoiqiç kanë kryer vrasjen e Oliver Ivanoviqit.

Sot ishte planifikuar të niste në orën 9 seanca, por u shty për orën 13, pasi anëtarja e Trupit gjykues e zënë.

Në seancën e fundit më 25 maj, në gjykatë ishte paraparë dëshmia e dëshmitari të mbrojtur A1, i cili për shkaqe sigurie kishte thënë se nuk deklarohet.

Seanca fillestare ishte mbajtur më 11 shkurt 2020, kurse Gjykata Themelore në Prishtinë, më 6 prill 2020, kishte refuzuar kërkesat për hudhjen e aktakuzës dhe kundërshtimet e provave.

Pas ankesave të katër avokatëve, Gjykata e Apelit kishte aprovuar ankesat e mbrojtësve dhe çështja ishte kthyer në rivendosje.

Sipas Apelit, në rivendosje nga gjykata e shkallës së parë duhet të eliminohen kundërthëniet, duke i dhënë mundësi prokurorit për tu deklaruar ose për ta korrigjuar dhe plotësuar aktakuzën në mënyrë që aktakuza të jetë në përputhje me nenin 241 të KPPRK-së.

Më pas, më 10 nëntor 2020, Prokuroria Speciale kishte përpiluar aktakuzën, ku thuhet se të pandehurit Nedejklo Spasojeviq, Marko Roshiq, Rade Basara dhe Silvana Arsoviq, nga viti 2014 deri në vitin 2018, respektivisht me datën 16 janar 2018, në qytetin e Mitrovicës, në bashkëpunim me të pandehurit Zheiko Bojiq, Zvonko Veselinoviq dhe Milan Radoiçiq, të cilët gjenden në arrati dhe me dy të pandehur tjerë që deri më tani janë të panjohur për organet e rendit, duke vepruar si grup i organizuar dhe i strukturuar, me hierarki në grup dhe me role të përcaktuara, nën udhëheqjen e të pandehurve Zvonko Veselinoviç dhe Milan Radoiçiç, në atë mënyrë që të gjithë të pandehurit në vazhdimësi dhe në bashkëveprim ndërmjet veti, me qëllim të shtrirjes së kontrollit në pjesën veriore të Mitrovicës, si në jetën politike dhe ekonomike dhe veprimtarinë e përgjithshme të grupit kriminal të organizuar, kanë vepruar me dashje dhe dijeni për të kryer veprën penale të vrasjes së rëndë, ku secili nga të pandehurit ditën kritike kur edhe ka ndodhur vrasja e tani të ndjerit Oliver Ivanoviq, kanë kryer veprime inkriminuese konkrete për qëllim të grupit në fjalë, me ç’rast si pasojë e veprimeve të këtij grupi kriminal të organizuar ka ardhur deri te vrasja e tani të ndjerit Ivanoviq.