Ka përfunduar afati kalimtar veror në të gjitha ligat e rëndësishme evropiane, përveç se në Spanjë që mbyllet sonte pas mesnate.
Ky afat kalimtar do të mbahet mend gjatë pasi është bërë transferimi më i shtrenjtë në histori të futbollit botëror me brazilianin Neymar që iu bashkua Paris Saint Germain nga Barcelona për 222 milionë euro.
Skuadër mjaftë aktive gjatë këtij afati u tregua edhe Manchester City që shpenzoi më së shumti në Evropë 244 milionë euro, kryesisht për ta përforcuar repartin defensivë.
Chelsea zë pozitën e tretë me 203 milionë euro të shpenzuara, ku në minutat e fundit nënshkroi me dyshen Drinkwater dhe Zapacosta.
Milan u zgjua nga gjumi i thellë që ishte këto vite dhe shpenzoi 194 milionë euro për ta përforcuar skuadrën.
Ndërkohë Barcelona zë vendin e pestë me 192 milionë euro, shumë që mund të shtohet në rast se transferojnë gjatë ditës së sotme ndonjë futbollist tjetër.
Manchester United ka mbetur në pozitën e gjashtë në tabelë me 164 milionë euro të shpenzuara, ndërsa Everton befasisht në pozitën e shtatë me gjashtë milionë më pak.
Kampionët e Italisë, Juventus vazhduan të përforcojnë skuadrën për të arritur tek Liga e Kampionëve dhe këtë afat kanë blerë futbollistë në vlerë prej 149 milionë euro.
Ndërkohë Bayern Munich zë pozitën e nëntë me 103 milionë euro, një më shumë se Monaco që ndodhet në vendin e 10-të. /Telegrafi/
1. Manchester City (244,300,000)
2. Paris Saint Germain (238,000,000)
3. Chelsea (203,000,000)
4. Milan (194,500,000)
5. Barcelona (192,500,000)
6. Manchester United (164,400,000)
7. Everton (158,200,000)
8. Juventus (149,200,000)
9. Bayern Munich (103,500,000)
10. Monaco (102,000,000)
