Toni Kroos ‘vjedh’ gjithë vëmendjen me kërkesën gazmore për lojtarët e Real Madridit për Topin e Artë

Pavarësisht tërheqjes së tij nga futbolli, Toni Kroos u emërua në listën e ngushtë prej 30 lojtarësh për Topin e Artë për vitin 2024.

Mbrëmë (e mërkurë) u publikua lista me 30 të nominuarit për Topin e Artë 2024, çmim i cili do të dhurohet më 28 tetor në Paris.

Në këtë listë nuk munguan emra yjesh që shihen si favorit për ta fituar si: Vinicius Junior, Rodri, Jude Bellingham, Kylian Mbappe dhe Erling Haaland.

They’re all here!

But… who should win it? #ballondor pic.twitter.com/SrkHBrJtuI

— Ballon d’Or (@ballondor) September 4, 2024

Në listë u përfshi edhe tashmë i pensionuari Kroos, i cili pati një sezon të përkryer me Real Madridin dhe Gjermaninë në Euro 2024.

Megjithatë, Kroos po përballet me konkurrencë të ashpër nga gjashtë lojtarë të Real Madridit – Jude Bellingham, Dani Carvajal, Vinicius Jr, Kylian Mbappe, Antonio Rudiger dhe Federico Valverde.

Këtë vit parashikohet që këtë çmim ta fitojë një lojtar i Real Madridit dhe Kroos me shaka u kërkoi ish-bashkëlojtarëve të tij dhe Mbappes që të linin çmimin për të këtë vit.

“Ejani. Ju të gjashtë mund ta bëni këtë vitin e ardhshëm”, ka shkruar Kroos në një foto ku shihen të nominuarit e Real Madridit.

Kroos e di se lojtarët kanë pak ose aspak fjalë se kush e fiton çmimin në fund të ditës, por postimi i tij ka tërhequr tashmë vëmendjen e të gjithëve. /Telegrafi/