Thimonier: Data e bisedimeve varet nga reformat dhe lufta kundër korrupsionit

Ambasadori i Francës në Maqedoni të Veriut në intervistë për Alsat theksoi nevojën e hetimit të plotë të rastit “Haraçi” me qëllim që të kthehet besimi në drejtësi dhe në institucione.

Thimonier, gjithashtu është i mendimit se bashkimi i PSP-së dhe Prokurorinë Publike është zgjidhje e mirë, përcjell Telegrafi Maqedoni.

Ai thotë se data e bisedimeve me Bashkimin Evropian varet nga lufta kundër korrupsionit dhe përmbushjes së reformave.

“Ekziston një listë e plotë e pikave, që kanë të bëjnë me luftën kundër korrupsionit, ndarjen e shtetit nga partia, reformat në administratë dhe fusha e mediave. Të gjitha këto pika, për fat të keq, janë në thelb të rastit për të cilin biseduam. Në të ardhmen, mbase mund të gjendet një zgjidhje për këto gjëra, brenda atij ligji. Unë mendoj se dy gjëra duhet të merren parasysh. E para, në lidhje me haraçin, në lidhje me televizionin, lidhur me lidhjen e supozuar me politikanët, duhet parë se si këto çështje do të zgjidhen brenda atij rastit të parë konkret. Gjëja e dytë ka të bëjë me atë, se si do të jetë reagimi i forcave të përfshira politike, për të gjetur një zgjidhje të qëndrueshme, e cila do të rikthejë besimin në mesin e popullit këtu në Maqedoninë e Veriut, si dhe besimin tonë në sundimin e ligjit dhe shtetin e së drejtës. Unë nuk mund të parashikoj për atë se çfarë përgjigjesh do të jepen. Ende ka kohë për të reaguar, për ta rikthyer atë besim, por është e sigurt që presim të bëhet diçka”, deklaroi për Alsat ambasadori francez Christian Thimonier./Telegrafi/