Thaçi kërkon thellimin e marrëdhënieve me Vatikanin

Presidenti i Kosovës, Hashim Thaçi gjatë vizitës në Vatikan është pritur në takim nga Sekretari i Shtetit të Vatikanit, kardinali Pietro Parolin.

Në këtë takim, presidenti Thaçi ka informuar kardinalin Parolin për forcimin e shtetit të Kosovës brenda dhe në arenën ndërkombëtare.

Ai ka thënë se pavarësia e Kosovës ka sjell paqe dhe stabilitet në rajon.

Presidenti ka falënderuar sekretarin Parolin për mbështetjen që Vatikani i ka dhënë popullit të Kosovës, duke thënë se tani është koha për thellimin e bashkëpunimit ndërmjet Kosovës dhe Selisë së Shenjtë.

“Mirënjohje për të arriturat e Kosovës do të ishte njohja nga tërë bashkësia ndërkombëtare. Njohja e Kosovës do të thotë njohje e aspiratës për liri e barazi, njohje e të drejtave dhe lirive të njeriut”, ka thënë presidenti.

Thaçi ka njoftuar sekretarin Parolin edhe për përgatitjet që janë bërë për ligjin për liritë fetare që pret miratimin nga Parlamenti i ri i Kosovës.

Ai po ashtu ka folur edhe për fazën e fundit të dialogut ndërmjet Kosovës dhe Serbisë, e cila do të përfundojë me normalizim të marrëdhënieve dhe njohje reciproke. /Telegrafi/