Terminali i gazit në Greqi, Gërxhaliu: Kosova nuk e ka komoditetin për politikë refuzuese

Ekonomisti Safet Gërxhaliu ka folur për qëndrimin e Kosovës karshi projektit amerikan dhe evropian të gazit, i cili ka filluar të ndërtohet në Greqi.

Gërxhaliu ka theksuar se vendi nuk e ka komoditetin që të gjenerojë politikë refuzuese, qoftë në aspektin politik, gjeostrategjik, gjeoekonomik dhe në atë energjetik.

“Besoj se është një momentum i ri sepse bota më nuk është ajo që ka qenë më parë falë pandemisë dhe luftës mes Ukrainës dhe Rusisë. Vet fakti që Evropa është orientuar në një projekt të tillë dhe në këtë edhe pse Serbia është aleate e Rusisë dhe merr pjesë në ceremoni të hapjes, është një sinjal se Kosova duhet të kuptojë të vërtetën se nuk është bota dhe se të gjithë duhet të sillen rreth Kosovës”.

“Është koha kur duhet të promovohet partneritet, dialog dhe në këtë drejtim besoj se është një moment të analizohet, në këtë mënyrë besoj se nuk po i bëhet nder Kosovës”, ka thënë Gërxhaliu, për Klan Kosova.

Lexo po ashtu Nis ndërtimi i terminalit të gazit të lëngshëm në Greqi, opozita kërkon llogari nga Kurti që nuk iu bashkua projektit

Në Aleksandropolis të Greqisë, sot është mbajtur ceremonia e fillimit të punimeve për ndërtimin e terminalit të gazit të lëngshëm natyror (LNG).

Brukseli zyrtar thotë se ndërtimi i këtij terminali do të ndihmojë Bashkimin Evropian të zvogëlojë varësinë e tij nga gazi rus sa më shpejt të jetë e mundur.

Projekti do të sigurojë burime dhe rrugë të reja për furnizimin me gaz natyror dhe do të përmirësojë sigurinë e furnizimit në Greqi, Bullgari dhe vende të tjera në rajonin e Evropës Juglindore, tha Këshilli Evropian.

Në këtë ceremoni morën pjesë edhe presidenti i Këshillit Evropian Charles Michel, kryeministri grek Kyriakos Mitsotakis, ai i Bullgarisë Kiril Petkov dhe shefi i qeverisë së Maqedonisë së Veriut Dimitar Kovaqevski, por edhe ai i Serbisë, Aleksandar Vuçiq.

Por në përurimin e një projekti të tillë, që njihet si i sponsorisuar nga SHBA-ja, nuk ishin përfaqësues nga Kosova.

Për këtë ka pasur reagime nga opozita në Kosovë.