Tentim vrasje në Suharekë pas mosmarrëveshjes rreth një parkingu

Tre persona janë përleshur për shkak të një mosmarrëveshje rreth një parkingu të automjeteve.

Sipas njoftimit që ka lëshuar policia rajonale e Prizrenit, ngjarja ka ndodhur mbrëmjen e së mërkurës rreth orës 19:30 në rrugën e “Buzhalëve”, në Shirokë të Suharekës.

Sipas njoftimit policor,  pas përleshjes, njëri nga të dyshuarit ka shkuar me automjet në një lokal dhe e ka marrë një armë me të cilën ka shtënë në drejtim të kundërshtarit por nuk e ka qëlluar. Të dyshuarit janë  marrë në pyetje për rastin.

“Rreth orës 19:30 minuta, në rrugën e ‘Buzhalëve’ në Shirokë të Suharekës ka ndodhur një ngatërresë e cila ka përfunduar me përdorimin e armës. Sipas raporteve hetimore, dyshohet se  tre të dyshuar: dy vëllezër dhe një tjetër kanë pasur një mosmarrëveshje rreth një parkingu te automjeteve e më pas janë përleshur. Pas përleshjes, njëri nga të dyshuarit ka shkuar me automjet në një lokal dhe e ka marrë një armë me të cilën ka shtënë në drejtim të kundërshtarit por nuk e ka qëlluar. Të dyshuarit janë  marrë në pyetje për rastin”, thuhet në njoftim.

Ndërkaq, një kalimtar ka kërkuar ndihmë mjekësore pasi që kishte pësuar një gërvishtje të lehtë në qafë e që mjeku nuk ka mundur ta përcaktoj se me çfarë ishte shkaktuar lëndimi dhe mbetet për t’u sqaruar  në hetimet e mëtejme.

“Është sekuestruar një pistoletë e llojit “PARABELLUM” Made in Korea me 7 fishekë”, thuhet tutje në njoftim.

Me urdhër të prokurorit, i dyshuari ndalet nën masën e arrestit policor.  /Telegrafi/