Teatri i Gjilanit sjell një program të pasur për muajin prill

Teatri i Gjilanit ka përgatitur një program dinamik për muajin prill, duke ofruar një kombinim mes premierave dhe shfaqjeve të vlerësuara që pritet të tërheqin një audiencë të gjerë.

Muaji hapet me premierën “God Bless America” më 9 dhe 10 prill, një vepër e autorit dhe regjisorit Fatos Berisha.

Kjo shfaqje sjell një qasje të guximshme dhe reflektuese mbi realitetet politike dhe shoqërore, duke përdorur një gjuhë teatrale të mprehtë dhe ironike. Me një ansambël të përzgjedhur aktorësh, kjo shfaqje synon të hapë diskutime mbi demokracinë dhe ëndrrën amerikane.

Për fëmijët dhe familjet, më 12 prill, Teatri Magjik i Fëmijëve sjell shfaqjen “Meri Popins”, një adaptim i njohur i veprës së Pamela Lyndon Travers, me regji të Blendi Arifit.

Shfaqja “Djali” nga Florian Zeller, një produksion i Ernest dhe Erson Zymberit, do të rikthehet në skenën e Gjilanit më 14 prill dhe do të prezantohet si mysafir në Teatrin Kombëtar të Kosovës në Prishtinë më 15-16 prill.

Programi vazhdon më 19 prill me shfaqjen mysafire për fëmijë “Borëbardha”, një produksion nga Dancing House.

Më 21 prill, publiku do të ketë mundësinë të ndjekë “Jam Unë Ajo”, një dramë origjinale mbi depresionin postnatal, e shkruar nga Valmira Thaçi dhe Dituri Neziraj, me regji të Erson Zymberit.

Më 24 dhe 25 prill, rikthehet komedia e fuqishme “Togeri nga Inishmori” nga Martin McDonagh, me regji të Shkëlzen Berishës.

Muaji do të përmbyllet më 29 prill me shfaqjen më të suksesshme të Teatrit të Gjilanit, “a.y.l.a.n”, një vepër e Jeton Nezirajt, me regji të Blerta Nezirajt. Kjo shfaqje ka fituar çmimin kryesor të jurisë “Grand Prix” në Poloni në vitin 2022.

Me këtë program të pasur dhe të larmishëm, Teatri i Gjilanit vazhdon të mbetet një qendër e rëndësishme e teatrit bashkëkohor në vend, duke ofruar një hapësirë për reflektim dhe argëtim për publikun e tij të gjerë. /Telegrafi/