Të ndalet njollosja e figurës së Gjergj Kastriotit

Gjergj Kastrioti nuk është figurë e thjeshtë, nuk është një hero i zakonshëm, nuk është një personalitet që mund t’i hedh balt secili që t’i teket. Sepse, për arbnorët, Gjergj Kastrioti është i shenjtë, është hero i heronjve, është vizionari dhe lideri i papërsëritshëm i kombit.

E gjithë bota, të gjithë historianët, kronistët, autorët dhe shkrimtarët evropianë flasin me admirim, flasin për shpirtmadhësinë, trimërinë dhe talentin e rrallë të këtij të tij. Dhe, me të drejtë shkruan kronisti Kaspar Mändl, në vitin 1728, se “kur gjendet ndonjë lloj armure (koarce) e vjetër dhe kur është pyetja se çfarë ajo tregon dhe e kujt është, të gjithë thonë: kjo është armure (koarce) e heroit të pamposhtur, Kastriotit Skanderbeg”.

Të gjithë flasin jo vetëm për jetën e tij sa ishte gjallë, për luftën e madhe dhe me fitore të njëpasnjëshme, por edhe për shenjtërinë e tij edhe pas vdekjes, për reliket që ai ka lënë, ose për veprat. Ndaj, një kronist tjetër shkruan, në vitin 1741: “Gjergj Kastrioti, ky hero botërisht i famshëm dhe tmerri i hënës turke”!

Duke parë se urtësia, talenti dhe trimëria e tij është vlerësuar tepër shumë nga autorë të shumtë dhe kronistë evropianë, sot në këtë shekull, figura, personaliteti i Gjergj Kastrioti sulmohet, njolloset, poshtërohet, shpallet terrorist dhe ofendohet (sikur tash nga një gjoja historian turk i cili ofendoi figurën e tij në Lezhë).

Një fyerje e tillë është bërë fyerje dhe poshtërim e njollosje ndaj tërë kombit arbnor. Prandaj, duke parë këtë, kombi ynë nuk duhet lejuar që t’i ofendohen figurat e shenjta, siç është Gjergj Kastrioti.

Këto njollosje e kanë burimin edhe nga brenda, sepse janë disa nga pushtetarët, si në Kosovë ashtu dhe Shqipëri, që kanë lidh vëllazëri me turq. Prandaj, kanë ardhur shumë individë e organizata që mision të vetëm kanë ndryshimin e historisë, njollosjen e figurave kombëtare dhe largimin e popullit nga e vërteta, duke e futur atë në kthetrat e gënjeshtrës dhe vetëshkatërrimit.

Kjo nuk duhet lejuar. Është koha që arbnorët e vërtetë të zgjohen dhe të mbrojnë vlerat dhe identitetin e personalitetet e tyre. Është koha që e gjithë shoqëria e vetëdijshme të ngrihet, të fillojë të jetojë si një shoqëri dhe popull që e do vlerën e tij, traditën e tij, kulturën e tij kombëtare evropiane, heronjtë dhe personalitete tjera të tij. Sepse, Gjergj Kastrioti luftoi për lirinë, atdheun dhe për mbrojtjen e vlerave të përbashkët të qytetërimit tonë.

Fyerja e figurave kombëtare, si më lartë, është fyerje për tërë ne dhe kombin tonë. Është koha t’i rikthehemi vetes dhe të fillojmë të ecim në rrugën tonë e jo në rrugën e shkatërrimit.