Të enjten seanca e jashtëzakonshme për ratifikimin e marrëveshjeve ndërkombëtare

Kryesia e Kuvendit të Kosovës, ka marrë vendim që të enjten në ora 14:00 të mbahet seancë e jashtëzakonshme për ratifikimin e tri marrëveshjeve ndërkombëtare, seancë kjo e thirrur nga partitë opozitare me 53 nënshkrime të deputetëve.

Shefi i Grupit Parlamentar të Partisë Demokratike të Kosovës (PDK), Memli Krasniqi në një prononcim për media ka thënë se LDK-ja më në fund  e ka kuptuar rëndësinë për ratifikimin e marrëveshjeve ndërkombëtare, të cilat sipas tij janë pamundësuar që katër muaj pikërisht nga kjo parti.

Krasniqi tha se shpreson që ky konsensus të ndikojë edhe sa i çështjeve tjera të rëndësishme, duke përfshirë këtu edhe  dialogun me Serbinë, raporton Telegrafi.

“Sot e mbajtëm një mbledhje të kryesisë e kërkuar në mënyrë urgjente nga partitë opozitare. Vonë mbrëmë na kanë informuar dhe pak u shqetësuam. Por sot në mëngjes e kuptova që GP LDK kishte zbuluar këto dy ditët e fundit që ratifikimi i marrëveshjet ndërkombëtare duhet të votohen sa më parë, ndërkohë që tre katër muajt e fundit ata e kanë bojkotuar seancën e këtyre marrëveshjeve, duke pamundësuar votimin e marrëveshjeve shumë të rëndësishme”, ka thënë Krasniqi.

“Besoj që ky ndryshim i qasjes do t’i ndjekë edhe për çështjet tjera të rëndësishme”, u shpreh ai.

Ndryshe, në këtë seancë të jashtëzakonshme do të diskutohen këto tre pika të marrëveshjeve ndërkombëtare:  Votimi i Projektligjit nr. 06/L-090 për Ratifikimin e Marrëveshjes Financiare për IPA 2017, pjesa e parë, ndërmjet Kosovës dhe Bashkimit Evropian; Votimi i Projektligjit nr. 06/L-094 për Ratifikimin e Marrëveshjes ndërmjet Kosovës dhe Bashkimit Evropian mbi pjesëmarrjen e Kosovës në programin “Evropa për qytetarët; Votimi i Projektligjit nr. 06/L-095 për ratifikimin e Marrëveshjes ndërmjet Komisionit Evropian dhe Kosovës mbi pjesëmarrjen e Kosovës në “ERASMUS +” Programin e Unionit për Arsim, Trajnim, Rini dhe Sport. /Telegrafi/