Takimi i Kurtit me Njësinë Speciale, ish-ushtaraku Veseli: Pa paqe sociale, nuk mund të garantohet siguria e vendit

Ish-oficeri i Forcës së Sigurisë së Kosovës (FSK), Afrim Veseli, ka shprehur mendimin se Kosova aktualisht përballet me sfida të shumta në lidhje me sigurinë kombëtare duke shtuar se vendit nuk i shërbejnë tensionet e krijuara nga çështjet sociale.

Komentet e tij vijnë në ndërkohë që po zhvillohet një takim midis Kryeministrit të Kosovës, Albin Kurti, dhe pjesëtarëve të Njësisë Speciale Intervenuese.

Takimi vjen si rezultat i protestave të zhvilluara më 1 nëntor nga këta pjesëtarë, ku ata kërkojnë rishikimin e kategorizimit të vendeve të tyre të punës dhe rritjen e shtesave për rrezikshmëri.

Veseli thekson se përpara se të adresohet çdo çështje tjetër, qeveria duhet të fokusohet në stabilizimin e gjendjes sociale, e cila mund të konsiderohet si parakusht për të garantuar më tej sigurinë e shtetit.

“Kur Kosova është në një situatë sfiduese për sigurinë e shtetit, Kosovës nuk i duhen probleme sociale. Një qeveri e vendit së pari duhet ta qetësojë situatën në aspektin social brenda popullatës, institucionet, pastaj në aspektin e sigurisë”, ka thënë Veseli në RTV Dukagjini.

Lexo po ashtu Kosova kërkon ndihmë nga rajoni për hetimet e sulmit në Banjskë, janë identifikuar 38 terroristë

Pjesëtarët e Njësitit Special Intervenues, njësiti më elitar i Policisë së Kosovës, kanë protestuar para ndërtesës së Qeverisë të Kosovës më 1 nëntor, duke kërkuar ndryshim të kategorizimit të vendeve të punës dhe shtesa më të mëdha të rrezikshmërisë.

Ata kanë paralajmëruar protestë edhe për datën 7 nëntor, por ajo është pezullua pasi kryeministri Kurti iu ka premtuar se do t’i presë në takim për të gjetur zgjidhje lidhur me kërkesat e tyre.

E takimi i Kurtit vetëm me Njësinë Speciale Intervenuese, është i papranueshëm për Sindikatën e Policisë së Kosovës./Telegrafi/