Tahiri: Qeveria e Kosovës ka dështuar në dialogun me Serbinë (Video)

Ish – kryenegociatorja në bisedimet e Brukselit në mes Kosovës dhe Serbisë, Edita Tahiri  ka theksuar se Qeveria e Kosovës ka dështuar në dialogun me Serbinë, duke mos marrë primatin e udhëheqjes së këtij procesi. 

Sipas saj, kryeministri ka thënë se ai nuk merret me dialogun e Brukselit.

“Unë mendoj që kjo Qeveri ka dështuar në dialog, fare nuk është marrë me këtë temë. Vet kryeministri ka thënë se unë nuk merrem me dialogun e Brukselit. Një kryenegociator vetëm nuk mund të bëj asgjë pa mbështetjen e Qeverisë dhe kryeministrit. Është emëruar Avni Arifi i cili asgjë nuk ka bërë, sepse ka munguar mbështetja e Qeverisë dhe kryeministrit”, ka deklaruar Tahiri.

Ndryshe, Tahiri ka vlerësuar se Serbia do të vazhdojë të paraqesë skenare të ndarjes së Kosovës.

Ajo në një intervistë për Telegrafin me gazetarin Muhamet Hajrullahu ka theksuar se Serbia po synon që ta realizojë idenë e Serbisë se Madhe, duke e përfshirë copëtimin e territorit të Kosovës, e këto sipas saj janë edhe lojëra gjeopolitike të Rusisë.

“Unë mendoj se nuk duhet të biem në këtë grackë, sepse Kosova i ka bërë kompromiset e mëdha në Rambuje e më pas edhe në Vjenë. Kompromisi më i madh i yni ka qenë Pakoja e Ahtisarit, e cila ia siguron pakicës serbe – që i ka vetëm pesë për qind të popullsisë – 10 komuna që përfshijnë një territor rreth 25 për qind të tërë territorit të shtetit”, ka shtuar Tahiri.

Më tutje ajo ka thënë se gjatë kohës që ajo e ka drejtuar ekipin e Kosovës në dialogun në mes Prishtinës dhe Beogradit, temat për të cilat nuk është diskutuar në asnjë rrethanë, kanë qenë tema e statusit të Kosovës, ndryshimi i kufijve dhe mosndryshimi i rendit kushtetues.

Ajo ka thënë se është paksa e befasuar me heshtjen e Bashkimit Evropian (BE) gjatë këtyre ditëve që po diskutohet për temën e shkëmbimit të territoreve. /Telegrafi/