Studim tjetër për ndryshimet klimatike: Ndotja e ajrit, rreziku tjetër i njerëzimit

Shumë shpejt mund të vdesin 260 mijë njerëz në vit para kohe, për shkak të ndotjes së ajrit dhe ndryshimeve drastike klimatike që paralajmërohen deri në vitin 2100, thotë studimi i ri shkencor.

“Vrasësi klimatik” do të godasë në të gjitha rajonet e botës, por përjashtim do të jetë vetëm Afrika. Autorët e studimit thonë se hulumtimi i tyre është i bazuar në faktet gjithëpërfshirëse, si kualiteti i rrezatimit dhe statistikat për vdekjet e parakohshme, transmeton Telegrafi.

Lexo po ashtu Ndryshimet e pariparueshme klimatike: Për 80 vite shumë qytete do të përmbyten nga uji e shumë të tjera nga thatësira! (Video)

Kështu, shkencëtarët nga Universiteti North Carolina (UNC), kanë thënë:

– Temperaturat më të larta do të përshpejtojnë reaksionet kimike që gjenerojnë ajër të ndotur;

– Vende që janë më të thata do të ndoten më shumë, sepse do të ketë më pak të reshura aty;

– Mungesa e shiut do të shtojë rrezikun për zjarr dhe pluhur në ajër;

– Pemët reagojnë ndaj temperaturave të larta, kështu që do të lëshojnë më shumë ndotës;

– Me rritje të ndotjes së ajrit vijnë rreziqet tjera të ndryshimit të klimës dhe vdekjet e parakohshme: stresi i ngrohjes, mungesa e ujit të pastër dhe e ushqimit, prania e stuhive të forta dhe përhapja e sëmundjeve infektive.

Jason West i cili udhëhoqi hulumtimin në UNC ka përdorur disa modele të klimës globale për të përcaktuar numrin potencial të vdekjeve të parakohshme. Për çdo model janë projektuar nivelet e ndotjes së ajrit që mund të ndodhin nga ndryshimet klimatike. Atëherë, këto ndryshime janë vënë në hartën e botës duke llogaritur rritjen e popullsisë dhe ndjeshmërinë e mundshme ndaj ndotjes së ajrit.

“Meqë ndryshimi i klimës po ndikon në përqendrimin e ndotësve në ajër, ajo mund të ketë ndikim të keq në shëndetin në mbarë botën dhe në numrin e vdekjeve të parakohshme”, ka thënë West.

Pesë nga tetë modelet që janë aplikuar kanë treguar se numri i vdekjeve të parakohshme do të rritet deri në 60 mijë në vitin 2030, e deri në vitin 2100 do të vdesin 260 mijë në vit njerëz për shkak të ndotjes së ajrit. /Telegrafi/