Sondazh nga Pyper: Shpërfillja e kufizimit të lëvizjes konsiderohet e papranueshme për 67.49 për qind të pjesëmarrësve

Prej se janë lehtësuar masat kufizuese më 4 maj, në shumë qytete të Kosovës është vërejtur një fluks i madh i qytetarëve e kjo gjë është kritikuar nga autoritetet.

Andaj, si rezultat i ngjarjeve të fundit në vend, kompania e hulumtimeve Pyper ka realizuar një sondazh lidhur me masat mbrojtëse përmes një mostre jo të rastësishme me 1221 pjesëmarrës.

Të dhënat tregojnë se për dallim prej pjesëmarrësve që konsiderojnë se masat mbrojtëse po respektohen mesatarisht (34.48%), rreth ¼ e pjesëmarrësve vlerësojnë se masat mbrojtëse që janë përcaktuar nga organet përkatëse nuk po respektohen aspak prej se janë lehtësuar.

Veç kësaj, edhe pse shpërfillja e kufizimit të lëvizjes që është vërejtur prej se janë lehtësuar masat po konsiderohet si veprim i pranueshëm nga 32.51% e pjesëmarrësve, 67.49% e pjesëmarrësve e kanë cilësuar këtë veprim të papranueshëm. Ndërkaq disa nga masat që ky grup i fundit konsiderojnë se duhet të ndërmerren nga qeveria janë të shtohet numri i patrullave policore (72.69%) si dhe të kthehet përsëri në 1 orë e gjysmë në ditë kohëzgjatja e lëvizjes (32.52%).

Duke marrë parasysh këtë fluks, ekzistojnë mendime të ndryshme rreth gjasave për t’u rritur numri i të infektuarve me COVID-19. Është interesante të theksohet se 14.25% vlerësojnë se nuk ka aspak gjasa që kjo të ndodh. Në anën tjetër, një numër i pjesëmarrësve vlerësojnë se ka mesatarisht gjasa (36.28%) dhe shumë gjasa (17.69%) që të rritet numri i të infektuarve me COVID-19.

Njëkohësisht, 33.50% e pjesëmarrësve e kanë kategorizuar veten në grupin e personave që nuk rrezikojnë të infektohen me COVID-19 edhe nëse nuk i përfillin masat e rekomanduara. Gjithashtu, vlen të theksohet se një numër i pjesëmarrësve konsiderojnë se nuk kanë nevojë për maskë (16.95%), dorëza (16.38) apo për të mbajtur distancën fizike (14.50%) për t’u mbrojtur nga COVID-19. Veç kësaj, 15.32% e pjesëmarrësve kanë cekur se nëse do ju duhej të shkonin në ndonjë dyqan ushqimor nuk do ta respektonin mbajtjen e distancës fizike.

Po ashtu, rreth 27.85% konsiderojnë se nuk do të ketë një valë të dytë të COVID-19 ndërsa 26.37% vlerësojnë se do të ketë valë të dytë. Gjithashtu, rreth ¼ e pjesëmarrësve janë optimist se virusi do të zhduket plotësisht gjatë javëve në vijim.

Veç kësaj, për t’u mbrojtur nga COVID-19, është paralajmëruar se nuk do të ketë grumbullime për ngjarje të ndryshme siç janë fejesat, ceremonitë martesore, mortore etj. Mirëpo me këtë nuk janë pajtuar disa pjesëmarrës. Më saktësisht, 24.98% mendojnë se duhet të lejohet organizimi i ceremonive mortore, organizimi i dasmave (23.26%), organizimi i ndeshjeve sportive me audiencë (20.31%), organizimi i fejesave (19.33%), organizimi i ditëlindjeve (19.08) si dhe organizimi i festivaleve (15.23%). Ndërkaq me organizimin e këtyre nuk janë pajtuar 44.80% e pjesëmarrësve.

Po ashtu, për t’i mbrojtur qytetarët e Kosovës nga përhapja e COVID-19 edhe më tej, personat që hyjnë në Kosovë vendosen në Qendrën e Studentëve. Mirëpo, duke marrë parasysh se sezona e verës po afrohet dhe bashkë me të edhe kthimi i atdhetarëve në Kosovë, qytetarët kanë mendime të ndryshme se si të veprohet në lidhje me këtë, duke përfshirë këtu lejimin e tyre të hyjnë në Kosovë por të vetizolohen në shtëpitë e tyre (40.54%), të karantinohen 2 javë në Qendrën e Studentëve (26.45%), të lejohen të hyjnë në Kosovë pa ndërmarrë ndonjë masë (18.76%) apo edhe të mos lejohen fare të hyjnë në Kosovë (14.25%). /Telegrafi/

Për më shumë klikoni KËTU

Mostra sipas gjinisë

Femër                   (53.15%)

Mashkull              (46.85%)

Mostra sipas grupmoshave

16 – 25 vjeç          (53.32%)

26 – 35 vjeç          (30.30%)

36 – 45 vjeç          (9.99%)

46+ vjeç               (6.39%)

Mostra sipas komunës

Prishtinë              (18.43%)

Prizren                  (7.53%)

Ferizaj                   (6.55%)

Mitrovicë             (6.22%)

Gjilan                    (6.06%)

Gllogoc                 (5.41%)

Podujevë            (4.83%)

Fushë Kosovë    (4.26%)

Pejë                       (4.26%)

Lipjan                    (4.01%)

Rahovec               (3.93%)

Gjakovë                 (3.77%)

Vushtrri                (3.69%)

Malishevë            (3.36%)

Suharekë              (2.70%)

Skenderaj            (2.21%)

Viti                         (2.05%)

Istog                      (1.72%)

Shtime                  (1.64%)

Klinë                      (1.39%)

Kaçanik                 (1.31%)

Deçan                   (1.23%)

Kamenicë            (1.06%)

Dragash                (0.82%)

Obiliq                    (0.82%)

Hani i Elezit        (0.25%)

Junik                     (0.16%)

Shtërpcë              (0.08%)

Kllokot                  (0.08%)

Zveçan                  (0.08%)

Novobërdë          (0.08%)