Skandali te Onkologjiku, Koçiu: E papranueshme që mjekët të trajtojnë jetët si mall

Ministrja e Shëndetësisë, Albana Koçiu, ka reaguar sërish lidhur me skandalin te Spitali Onkologjik në QSUT.

Përmes një deklarate për mediat, Koçiu tha se inkurajon Prokurorinë që të vijon hetimet dhe shtoi se paralelisht me këto hetime, po zhvillohet edhe një hetim administrativ për të zbuluar më shumë rreth skandalit.

Ajo tha gjithashtu se është e papranueshme që mjekët të trajtojnë jetët njerëzore si një mall në tregun e shumicës.

“Nuk mund të lë pa risjellë në vëmendje reagimin për trazimin që solli situata e djeshme në Spitalin Onkologjin në QSUT. Dua ta theksoj se korrupsioni është vija e kuqe ndarëse mes interesit të çdo qytetari dhe kujtdo që i shkon mendja për të kryer veprime të tilla të turpshme që nuk i përkasin figurës së mjekut e infermierit.

Ne kemi nisur një hetim administrativ krahas hetimit të prokurorisë, të cilën e inkurajoj që t’i shkojë deri në fund të gjithë procesit të hetimit dhe të ndëshkojë në mënyrë shembullore të gjithë ata që kanë kryer procedura që cenojnë figurën e mjekut e infermierit dhe që i dënojnë penalisht. Hetimi që ne kemi nisur me strukturat administrative është një hetim që do të trajtojë në shumë aspekte çështjet e organizimit e punës në këtë shërbim.

Është e papranueshme që mjeku, figura më e lartë që duhet t’i shërbejë njerëzve me përkushtim çdo ditë, të mund të trajtojë jetën njerëzore si një mall në tregun e shumicës. Duam të sjellim në një dimension tjetër figurën e mjekut e infermierit. Bëhet fjalë për të bërë amendamentime në ligjin për urdhrin e mjekut, për të vendosur edhe aty sanksione të forta për këto që e trajton jetën njerëzore si një mall”, tha Koçiu.

Kujtojmë se ishte një hetim i prokurorisë së Tiranës që ka arritur të zbulojë një skeme se si mjekë të spitalit të Onkologjikut shisnin ilaçe të spitalit tek subjektet private.

Për të provuar ekzistencën e këtij dyshimi nga ana e prokurorisë u përdorën blerje të ilaçeve të stimuluara. Kryesisht u blenë ilaçe që përdorën për kimioterapi.

Me kërkesë të Prokurorisë, Gjykata e Tiranës ka caktuar 8 masa ‘arrest shtëpie’ dhe ‘detyrim paraqitje’ për mjekë të spitalit Onkologjik:

Edmond Gashi (Mjek në Spitalin Onkologjik në QSUNT)

Emiljano Lela (Koordinator në Spitalin Onkologjik ne QSUNT)

Alketa Ymeri (Pere) (Mjeke në Spitalit Onkologjik ne QSUNT)

Brikena Qirjazi (Zv/Drejtoreshe ne QSUNT e ngarkuar me detyra për shërbimin onkologjik)

Halil Gashi

Florian Marku. /euronews/