Sindikatat kërkojnë që të mos anashkalohet Ligji për Paga nga projektbuxheti

Përfaqësuesit e Sindikata e Bashkuar e Arsimit, Shkencës dhe Kulturës (SBASHK), Federata e Sindikatave të Shëndetësisë së Kosovës (FSSHK), Sindikata e Policisë së Kosovës, Sindikatës së Zjarrfikësve dhe Doganave, përmes një komunikate për medie kanë njoftuar se kanë mbajtur një takim të përbashkët duke debatuar për situatën në këta sektorë pas lajmit të shpërndarë se mund të mos jenë paraparë mjete në projektligjin e buxhetit për zbatimin e Ligjit të Pagave.

Ata kanë deklaruar se situata në sektorët që përfaqësojnë është acaruar dhe se kanë nisur të shtohen kërkesat e anëtarësisë që të bëhen përgatitje për të nisur edhe me veprime sindikale nëse Ministria e Financave dhe kryeministri nuk ofrojnë dëshmi se janë bërë planifikime buxhetore për Ligjin e Pagave.

“Duke u gjendur në këtë situatë përfaqësuesit e FSSHK-së, SPK-së, Sindikatës së Zjarrfikësve dhe Doganave kanë vendosur bashkërisht që t’i drejtohen kryeministrit Albin Kurti për një takim urgjent e në momentin më të afërt të mundshëm për të debatuar për këtë çështje. Në takimin me Kryeministrin Kurti përfaqësuesit e këtyre pesë sindikatave do të kërkojnë nga ai që të shpalos planin e Qeverisë për rritjen e mirëqenies së punëtorëve në Republikën e Kosovës nëse Ligji për Paga zvarritet edhe më tutje”, thuhet në komunikatën e tyre për medie.

Kryetari i SBASHK-ut, Rrahman Jasharaj në një prononcim për Telegrafin, nuk përjashtoi mundësinë e grevës në rast se më buxhetin e vitit 2020 nuk përfshihet edhe kostoja e Ligjit të Pagave.

Lexo po ashtu SBAShK-u nuk përjashton mundësinë e grevës, nëse Ligji për paga nuk përfshihet në buxhetin e këtij viti

“Nëse nuk parashihet në projektbuxhetin për vitin 2020, ligji për paga atëherë kam frikë se do të jetë kërkesa e anëtarësisë së SBASHK-ut, do të ketë kërkesa për grevë. Nëse anëtarësia kërkon një gjë të tillë unë jam i obliguar dhe do ti qëndrojë në ballë edhe grevës dhe veprimeve tjera që anëtarësia do t’i kërkojë nga ne”, ka thënë Jashraj.

Ligji për Paga në sektorin publik për shërbyesit civil u miratua një vit më parë më 2 shkurt 2019 në seancën e Kuvendit të Kosovës.

Kujtojmë se në shenjë pakënaqësie për këtë projektligj, për tri javë rresht patën hyrë në grevë punëtorët e arsimit në të gjitha nivelet e arsimit publik në Kosovë. Në grevë hynë edhe punëtorët shëndetësor, ata të administratës dhe të institucioneve të tjera publike. /Telegrafi/