Si arriti ChatGPT të ndryshojë botën brenda një viti?

Të enjten më 30 nëntor janë bërë 1 vit prej kur OpenAI lansoi chatbotin me Inteligjencë Artificiale, ChatGPT, një platformë që fitoi popullaritet të menjëhershëm në mesin e shumë përdoruesve.

Popullariteti i ChatGPT bëri që shumë gjigantë të teknologjisë sikurse Meta dhe Google të punonin në mjete të ngjashme me AI, transmeton Telegrafi.

“Një vit më parë, këtë natë kemi qenë në zyrë me gjasë duke realizuar detajet e fundit në ChatGPT, përpara lansimit të nesërmen në mëngjes. Çfarë viti!”, ka shkruar CEO i kompanisë OpenAI, Sam Altman në rrjetin social X, për përvjetorin e parë të platformës.

Lexo po ashtu Mira Murati në mesin e 25 grave më të fuqishme në botë, sipas gazetës Financial Times

Por pse ChatGPT fitoi kaq shumë popullaritet dhe si arriti që të transformojë botën përgjatë 1 viti? Euronews ka përmbledhur së paku tre ndryshimet që solli ChatGPT në botën e teknologjisë gjatë kësaj periudhe.

1 – ChatGPT përshpejtoi revolucionin e Inteligjencë Artificiale

OpenAl lansoi platformën për gjenerimin e imazheve nga teksti “DALL-E” dhe GPT-3.5, përpara se të lansonte ChatGPT-n më 30 nëntor të vitit 2022.

Chatboti u bë mjeti ‘online’ më i shpejtë i adoptuar në botë, me mbi 1 milion përdorues në 5 ditë. (Rekordi u thye nga Threads i Meta-s, i lansuar në korrik).

2 – ChatGPT sfidoi dominimin e Google

ChatGPT sfidoi dominimin e gjigantit teknologjik Google, në fushën e përkthimit dhe marrjes së informacionit. Microsoft investoi miliarda në OpenAl, duke integruar teknologjinë e ChatGPT në shërbimet e tyre si një pjesë e përpjekjeve për të rivalizuar Google.

3 – ChatGPT shpërfaqi aftësi të reja

Nga kodimi deri te përmbajtja krijuese, ChatGPT ka bërë teknologjinë e Inteligjencës Artificiale më të qasshme për publikun e gjerë. Përdorimi i këtyre mjeteve në fusha si puna dhe shkolla ka bërë që këto aftësi të sjellin një ndryshim të madh në mënyrën se si e përdorim teknologjinë në jetën tonë të përditshme.

Inxhinierët e Al-s, janë disa nga ekspertët më të kërkuar, me paga që pritet të arrijnë deri në 300 mijë euro në vit.

Megjithatë, ndonëse ka sjellë inovacion dhe mundësi të reja, ChatGPT nuk ka qenë pa polemika.

Lexo po ashtu Musk: Mendoj se OpenAI ka bërë një zbulim të rrezikshëm që ka çuar në shkarkimin e Altman

Shqetësimet për shkeljen e të drejtave të autorit dhe impaktin e saj në kulturë dhe art janë ende të diskutueshme.

Sidoqoftë ky vit i parë ka treguar një histori të ndryshimit dhe ndikimit të madh në fushën e teknologjisë dhe Inteligjencës Artificiale. /Telegrafi/