“Shumë herët” për të pretenduar që varianti i ri i coronavirusit është më vdekjeprurës, thonë ekspertët britanikë

Dy mjekë kryesorë britanikë po shprehin skepticizëm rreth nivelit më të lartë të vdekshmërisë të lidhur me variantin e ri të coronavirusit aktualisht i përhapur në Mbretërinë e Bashkuar.

Sipas BBC, përcjell Telegrafi, në një konferencë për shtyp, kryeministri britanik, Boris Johnson, tha se kishte prova të hershme se varianti i ri – i identifikuar së pari në Londër dhe në jug-lindje – mund të jetë më vdekjeprurës.

Mirëpo, drejtoresha mjekësore e Shëndetit Publik të Anglisë, Yvonne Doyle, thotë se ende nuk është “absolutisht e qartë”, që varianti i ri shkaktoi më shumë vdekje.

Lexo po ashtu Boris Johnson: Varianti i ri i coronavirusit më vdekjeprurës

“Ka disa prova, por është provë shumë e hershme. Është numër i vogël i rasteve dhe është shumë herët të thuhet se kjo do të ndodhë në të vërtetë”, tha ajo për BBC.

Edhe Mike Tildesley, një anëtar i nëngrupit Sage të Grupit Shkencor të Gripit Pandemik mbi Modelimin (Spi-M), pajtohet me Doyle.

Tildesley thotë se është ende herët për të nxjerrë “përfundime të forta”, bazuar “në një sasi relativisht të vogël të të dhënave”.

“Unë thjesht shqetësohem kur ne raportojmë gjëra paraprakisht, kur të dhënat nuk janë me të vërtetë posaçërisht të forta”, deklaroi ai. /Telegrafi/