Shpërthen një vullkan në Indonezi, tymi dhe hiri që nxori u shpërnda në disa kilometra në ajër

Ka shpërthyer vullkani Krakota, që ndodhet në bregdetin e Indonezisë dhe ka hedhur hi deri në 15 kilometra.

Gjatë orëve të mbrëmjes, qendra e kontrollit të vullkaneve i ka regjistruar dy shpërthime të fuqishme, derisa të tjerat që ishin të njëpasnjëshme kanë pasur kapacitet më të vogël, transmeton Telegrafi.

Banorët në Xhakarta që ndodhet afro 150 kilometra larg, kanë thënë se dëgjuan një ushtimë të madhe, në kohën kur raportohet të ketë ndodhur shpërthimi.

Në kamerat që e monitorojnë aktivitetin e këtij vullkani, shihet llava derisa del nga krateri, e përcjell me shumë tym dhe hi, që është shpërndarë në ajër më pas.

Qendra për vullkane dhe tragjedi gjeologjike, ka bërë të ditur se shpërthimi i parë ka zgjatur një minutë e 12 sekonda, me nxjerrjen e llavës së vazhdueshme si dhe tymit të dendur që arrinte deri në 200 metra lartësi.

Derisa shpërthimi i dytë ka zgjatur 38 minuta e 4 sekonda, me llavë më të rrallë por me shumë tym të dendur që ngrihej lartë deri në 500 metra. /Telegrafi/