Futbolli shpesh herë krijon miqësi të reja, por që ato miqësi mund të zgjasin gjatë gjithë jetës, pasi bëhen shumë të forta.
E tillë është edhe miqësia e dy futbollistëve shqiptarë, Ermir Lenjanit dhe Amir Abrashit.
Në katër periudha të ndryshme, dy futbollistët nga Kosova që jetojnë në Zvicër kanë qenë së bashku.
Lenjani me prejardhje nga Kamenica është i lindur në vitin 1989, derisa një vit më i vogël se ai është Amir Abrashi që me prejardhje është nga Gjakova.
Por miqësia e tyre ka lindur në qytetin Winterthur në Zvicër, një qytet ku jetojnë mijëra bashkëatdhetarë nga Kosova.
Dy futbollistët karrierën e kanë nisur në klubin e qytetit Winterthur, pastaj vazhduan së bashku tek klubi më i madh zviceran Grasshoppers në vitin 2010.
Nga ai moment u ndanë rrugët e tyre, pasi Lenjani shkoi te St Gallen, derisa Abrashi mbeti pjesë e GC.
Përkundër se luanin në skuadra të ndryshme, dyshja mbante raporte të forta mes vete, por ribashkimi i tyre ndodhi në vitin 2013, në Kombëtaren e Shqipërisë ku sot e asaj dite vazhdojnë të jenë ndër lojtarët më të rëndësishëm të kuqezinjve.
Në një rrëfim ekskluziv nga Zvicra, dy lojtarët tregojnë për Telegrafin rreth shoqërisë së tyre.
Lenjani e kujton shumë mirë ditën e parë kur është takuar me Amirin rreth 13 apo 14 vite më parë.
"Ka 12 apo 13 vite që e njoh Amirin dhe e para herë kur e kam parë kam qenë me shok duke luajtur futboll, derisa ai luante vet. Në atë moment i thash eja luaj me ne", nis rrëfimin e tij Lenjani.
Ndërkohë Amiri thotë se Ermirin e ka pasur gjithmonë si vëlla të madh. "Kam mësuar shumë prej Ermirit. Më ka marrë gjithkah me vete edhe në stërvitje pasi e ka pasur lejën e kerrit", thotë Amiri duke qeshur.
Dyshja nuk e harrojnë edhe debutimin e tyre me Winteruthin dhe Grasshoppersin, por edhe ndeshjen e parë me Kombëtaren e Shqipërisë.
Ndër të tjera ata tregojnë se ku do ta përfundojnë karrierën e tyre futbollistike.
Nuk kanë munguar edhe batutat sa i përket jetës private të futbollistëve, ku Ermiri tanimë ka krijuar një familje pasi është i martuar dhe ka një djalë, derisa Amiri thotë se në të ardhmen do ta bëj një gjë të tillë, e që gruaja duhet të jetë nga Gjakova.
Për më shumë ndiqeni intervistën ekskluzive të dy yjeve shqiptarë për Telegrafin. /Telegrafi/
