“Shkova me pushime, më kapi në befasi”, Zubimendi flet për ofertën e Liverpoolit

Mesfushori i Real Sociedadit, Martin Zubimendi, ka folur për ofertën e Liverpoolit për ta nënshkruar verën e fundit, duke zbuluar se ai zgjodhi të qëndrojë me klubin e tij të fëmijërisë për shkak të përparimit të tij personal dhe projektit të ekipit.

Zubimendi, 25 vjeç, ishte shumë i lidhur me një lëvizje në Anfield gjatë afatit kalimtar të verës, me menaxherin e Liverpoolit, Arne Slot, duke e identifikuar atë si objektivin kryesor.

Megjithatë, përkundër interesimit të Reds dhe Manchester Cityt, Zubimendi vendosi të qëndrojë te Sociedadi, ku është që nga mosha 12-vjeçare.

“Shkova me pushime dhe më ka zënë në befasi. Nuk ishte diçka që e kisha planifikuar”, ka thënë Zubimendi për ofertën e Liverpoolit.

“Unë reagova kur u krijua situata. Ishte një kohë e pakëndshme për mua… por peshova të mirat dhe të këqijat… dhe arrita në përfundimin se opsioni më i mirë ishte të qëndroja”.

Zubimendi përmendi rritjen e tij personale dhe projektin e klubit si faktorë vendimtarë në vendimin e tij.

“Kam parë progresin tim personal, kush jam, dhe projektin e klubit… Qëndrova sepse e dija se ky sezon do të ishte i rëndësishëm për mua në skuadër dhe kisha ende hapa për të ndërmarrë. Nuk ishte aq e vështirë të merrja një vendim të tillë”, përfundoi mesfushori.

Me mbi 200 paraqitje në ekipin e parë për Sociedad, Zubimendi është vendosur si një lojtar kyç për klubin bask. /Telegrafi/