Shkëlzen Maliqi: Pavarësia është projekt shekullor, por storja s’ka përfunduar (Video)

Publicisti Shkëlzen Maliqi e quan pavarësinë e Kosovës një projekt shekullor, por rikujton se ajo nuk është rrumbullakuar ende, prandaj vlerëson se duhet bërë më shumë, në mënyrë që puna e nisur të kryhet me sukses.

Ai mendon se qytetarët e duan shtetin e Kosovës, të shpallur para 10 vjetësh, ndërsa thotë se pavarësia ende është proces i papërfunduar, prandaj Kosova duhet të përmbushë obligimet që ka para vetës.

“Pavarësia e Kosovës nuk është rrumbullakuar ende në plotni. Nuk jemi ende anëtar të Kombeve të Bashkuara, domethënë shtet sovran që i ka të gjitha të drejtat si shtetet tjera sovrane. Prandaj, duhet të jemi më fleksibilë në përmbushjen e disa obligimeve, që kjo të realizohet. Duhet ta duam edhe ardhmërinë e brezave të rinj, të fëmijëve tanë, jo vetëm atë që e kemi arritur para 10 vjetëve, sepse storja nuk është e përfunduar ende ashtu si duhet”, shprehet ai.

Maliqi konsideron se ajo që ka arritur Kosova është diçka e madhe, por vetë-mashtrimi nuk duhet të ndodhë.

“Kjo që është arritur – është shumë e madhe. Pavarësia është projekt shekullor. Duhet të jemi vigjilentë dhe të punojmë më shumë, edhe qytetarët, edhe forcat politike, që kjo punë e filluar të kryhet me sukses. Potencialet i kemi, po nuk duhet të vetë-mashtrohemi”, ka deklaruar Maliqi. /Telegrafi/