Shkatërrohet një numër i madh armësh të vogla dhe të lehta

Zyrtarë të Bashkimit Evropian në Kosovë thanë sot se BE është e përkushtuar të përkrahë në mënyrë sistematike partnerët e Ballkanit Perëndimor në luftën kundër trafikimit të armëve.

Ata këto komente i bënë me rastin e shkatërrimit të një numri të madh armësh të vogla dhe të lehta nga Policia e Kosovës në “Metal Holding” në Ferizaj, e cila u organizua nga Ministria e Punëve të Brendshme dhe në mbështetje të Zyrës Qendrore për Kontrollin e Armëve të Vogla dhe të Lehta (SEESAC), Zyra e Jashtme Gjermane dhe UNDP.

Zëvendësministri në detyrë i Punëve të Brendshme, Behar Selimi tha se ky është një aktivitet në të cilin Kosova përpiqet të jetë pjesë e iniciativave rajonale për më shumë siguri për qytetarët dhe për më shumë siguri rajonale.

Me këtë rast, ai tha se grumbullimi i këtyre armëve është bërë në sajë të punës së kryer nga Policia e Kosovës dhe Prokuroria.

“Përgëzoj Policinë e Kosovës dhe Prokurorinë në punën e madhe që e kanë bërë në muajt e kaluar në drejtim të realizimit të Strategjisë Nacionale për Kontrollimin dhe Grumbullimin e Armëve të Lehta dhe të Vogla”, tha Selimi.

Katerina Lopo, përfaqësuese e BE në Kosovë tha se Strategjia e Bashkimit Evropian për Armët e Vogla dhe të Lehta identifikon Ballkanin Perëndimor, si prioritet kryesor.

“BE është e përkushtuar të përkrahë në mënyrë sistematike partnerët e Ballkanit Perëndimor në luftën kundër trafikimit të armëve”, tha ajo.

Zëvendësdrejtori i Përgjithshëm i Policisë së Kosovës, Naim Rexha, tha se Policia e Kosovës vazhdimisht punon në zhvillimin e kapaciteteve të saja për të pasur sa më shumë sukses në konfiskimin e armëve të jashtëligjshme dhe do të jetë e përkushtuar të largojë mjetet e jashtëligjshme të dhunës nga duart e qytetarëve, pasi ky është element thelbësor që po i kontribuon rendit dhe ligjit dhe sigurisë publike në vend.

Ndërsa, koordinatorja e Programit të UNDP, Valbona Bogujevci, tha se UNDP është e gatshme që të vazhdojë ndihmën dhe përkrahjen dhe të punojë ngushtë me palët e interesuara në adresimin e sfidave të ngjashme në të ardhmen.

Ajo tha se në kohën në të cilën po jetojmë, armët e tilla dhe eksplozivët po bëhen gjithnjë e më shumë të zgjedhura për sulme terroriste.