Shi dhe stuhi në të gjithë Shqipërinë – në periferi dhe fshatrat e Shkodrës lëvizet me varka

Shkodranët në periferi të qytetit dhe në disa fshatra kanë nxjerrë varkat. Ato jane mjeti i vetem për të komunikuar në rruget e mbuluara nga uji. Oborret dhe katet e para të banesave janë përmbytur.

“Ka rreth 30 centimetra ujë. Kam dëme në rroba dhe mobilje.”

Gjithashtu është përmbytur dhe zona pranë xhamisë së Plumbit.  Në Vaun e Dejës, përroi Gline dhe lumi Gjadër kanë dalë nga shtrati. Rrugë e banesa në Vig Mnele, Hajmel dhe Shllak janë përmbytur. Edhe energjia elektrike në këto zona është ndërprerë. Mjetet në zonat rurale kanë mbetur në mes të rrugës.

Në Fushën e Muriqanit 400 ha tokë janë nën ujë.

Në Bajzë janë përmbytur katet e para të disa banesave. Në Malësinë e madhe ka dalë nga shtrati përroi i thatë.

Disa Rrugë rurale në Fushë-Arrëz janë bllokuar për qarkullim nga rreshqitjet e gurëve. Edhe energjia elektrike në këto zona është ndërprerë prej disa orësh.

Në qarkun e Lezhës, Sipqërfaqe të mëdha tokash bujqësore në fushën e Torovicës janë përmbytur. Nga Gjadri nën uje, ministri i mbrojtjes, Niko Peleshi tha se emergjencat civile janë në gatishmëri.

“Situata po mbahet në kontroll, deri tani nuk ka banorë të evakuar.”

Pjerin Ndreu kreu i bashkisë Lezhë tha se po mbajnë në monitorim gjithë territorin.

“Ka një rëndim të situatës se po kryen shkarkim nga histrocentrali i Vaut të Dejës.”

Në shumë fshatra të Lezhës nuk ka energji. Rreshjet intensive të shiut kanë përmbytur disa rrugë në zonën e Shëngjit dhe Lëvizja e automjeteve është vështirësuar. Po në Shëngjin eshte pezulluar dhe lundrimi detar per te gjitha mjetet.

Në Qarkun e Kukësit më shumë probleme nga moti ka në Bashkine Tropoje. Shkarjet e dherave në disa zona pengojnë qarkullimin e mjeteve. Në Bejli janë demtuar dy ura që janë duke u ndertuar.

Në disa njësi administraive të qarkut janë dëmtuar shtyllat elktrike, duke ndërprerë edhe furnizimin me energji.

Era e fortë në Vlorë ka rrëzuar pemë në lagjen 10 korriku, ku gjatë orëve të natës kanë shkaktuar bllokim ne disa rrugë.Një rrap ështe rrëzuar pranë një banese në fshatin Tragjas duke dëmtuar murin rrethues së saj. Bashkia bën thirrje që mos të parkohen mjete në disa rrugë: Albano dhe Romina, pranë Bibliotekës dhe në Skelë. Edhe lundrimi në det është pezulluar.

Disa rrugë të qytetit të Durrësit janë përmbytur. Këmbësorët janë bllokuar dhe lëvizin me vështirësi. Situata me problematike paraqitet ne lagjet 5 dhe 18. Në disa rruge të tyre është e pamundur të kalohet për shkak të bllokimit të pusetave.

Dhe në Sillej të Kavajës përrenjtë kanë përmbytur toka bujqësore dhe uji ka hyrë dhe në oborret e disa banesave. Disa ura janë dëmtuar. Ndërsa në Gjirokastër stuhitë e erës kanë shkaktuar probleme në furnizimin me energji elektrike, sidomos në zonat rurale, euronewsal.