Shefi i Pentagonit konfirmon pauzimin e dërgesës së armëve për Izraelin

Sekretari amerikan i Mbrojtjes, Lloyd Austin, ka konfirmuar raportet se Shtetet e Bashkuara kanë pauzuar një dërgesë armësh në Izrael, pasi administrata e presidentit Joe Biden përballet me presion në rritje për të kushtëzuar ndihmën për aleatin më të lartë të SHBA-së në mes të luftës në Gaza, shkruan Al Jazeera.

Duke dëshmuar para një nënkomisioni të Kongresit të SHBA të mërkurën, Austin tha se administrata e Biden ka pauzuar “një dërgesë municionesh” mes shqetësimeve rreth shtytjes së ushtrisë izraelite për të pushtuar qytetin jugor të Gazës, Rafah, transmeton Telegrafi.

“Ne kemi qenë shumë të qartë që në fillim se Izraeli nuk duhet të nisë një sulm të madh në Rafah pa llogaritur dhe mbrojtur civilët që janë në atë hapësirë”, u tha Austin ligjvënësve amerikanë.

Lexo po ashtu SHBA ka “pauzuar” dërgesën e bombave për Izraelin për shkak të shqetësimeve të Rafah

“Ne nuk kemi bërë një përcaktim përfundimtar se si të vazhdojmë me atë dërgesë [armësh]”, shtoi shefi i Pentagonit, duke vënë në dukje se transferimi është i ndarë nga një paketë ndihmëse shtesë për Izraelin që u miratua në fund të prillit.

“Komenti im i fundit është se ne jemi absolutisht të përkushtuar që të vazhdojmë të mbështesim Izraelin në të drejtën e tij për të mbrojtur veten”, shtoi Austin. /Telegrafi/