SHBA urdhëron personelin e saj jo emergjent të largohet nga Sudani i Jugut

Shtetet e Bashkuara kanë urdhëruar personelin e tyre qeveritar jourgjent në Sudanin e Jugut të largohen nga vendi për shkak të shqetësimeve të sigurisë, tha të dielën Departamenti i Shtetit.

“Konflikti i armatosur është në vazhdim dhe përfshin luftime ndërmjet grupeve të ndryshme politike dhe etnike. Armët janë lehtësisht të disponueshme për popullatën”, tha Departamenti i Shtetit, shkruajnë mediat e huaja, përcjell Telegrafi.

Agjencia për të drejtat e Kombeve të Bashkuara theksoi të shtunën se rritja e dhunës dhe fërkimeve politike në Sudanin e Jugut kërcënuan procesin e brishtë të paqes.

Në fillim të këtij muaji, forcat e sigurisë besnike të Presidentit Salva Kiir arrestuan dy ministra dhe disa zyrtarë të lartë ushtarakë aleatë me Riek Machar.

Arrestimet kanë ngritur frikën për të ardhmen e një marrëveshjeje paqeje të vitit 2018, e cila i dha fund një lufte civile pesëvjeçare midis forcave besnike të Kiir dhe Machar që kushtoi me afro 400,000 jetë.

Departamenti i Shtetit tha se krimet e dhunshme duke përfshirë vjedhjet e makinave, të shtënat, pritat, sulmet, plaçkitjet dhe rrëmbimet janë të zakonshme në të gjithë Sudanin e Jugut, duke përfshirë edhe në Juba.

Zona është shumë e rrezikshme për gazetarët, si dhe për punonjësit e qeverisë amerikane, të cilët janë nën shtetrrethim të rreptë dhe duhet të përdorin automjete të blinduara për pothuajse të gjitha lëvizjet. /Telegrafi/