SHBA akuzon miliarderin indian Gautam Adan për mashtrim

Miliarderi indian Gautam Adani është akuzuar për mashtrim në SHBA, nën akuzat për orkestrimin e një skeme ryshfeti prej 250 milionë dollarësh.

Akuzat penale, të ngritura në New York, janë goditja më e fundit për 62-vjeçarin Adani, një nga njerëzit më të pasur të Indisë, perandoria e biznesit e të cilit shtrihet nga portet dhe aeroportet tek energjia e rinovueshme.

Pas ngritjes së akuzave, bëhet e ditur se aksionet e kompanive të Grupit Adani ranë më shumë se 10%, duke humbur kështu rreth 30 miliardë dollarë në kapitalizimin e tregut, shkruan BBC, përcjell Telegrafi.

Ndërkohë, Adani Green Energy, e cila është kompania në qendër të akuzave, tha gjithashtu se nuk do të vazhdonte me një ofertë obligacioni prej 600 milionë dollarësh.

Raportet për këtë hetim për ryshfet qarkullojnë prej muajsh.

Prokurorët thanë se SHBA filloi hetimin e kompanisë në vitin 2022 dhe gjeti se hetimi ishte penguar.

Ata pretendojnë se drejtuesit e saj mblodhën 3 miliardë dollarë nga kreditë dhe obligacionet, duke përfshirë ato nga kompanitë amerikane, në bazë të deklaratave të rreme në lidhje me praktikat dhe politikat kundër ryshfetit.

“Siç pretendohet, të pandehurit orkestruan një skemë të përpunuar për të korruptuar zyrtarët e qeverisë indiane për të siguruar kontrata me vlerë miliarda dollarë dhe gënjyen për skemën e ryshfetit ndërsa kërkonin të mblidhnin kapital nga investitorët amerikanë dhe ndërkombëtarë”, tha avokati amerikan Breon Peace në një deklaratë që shpall akuzat.

“Zyra ime është e përkushtuar për të çrrënjosur korrupsionin në tregun ndërkombëtar dhe për të mbrojtur investitorët nga ata që kërkojnë të pasurohen në kurriz të integritetit të tregjeve tona financiare”, shtoi ai.

Ndryshe, Adani është një aleat i ngushtë i kryeministrit indian Narendra Modi.

Ai është përballur prej kohësh me pretendime nga politikanët e opozitës që pretendojnë se ka përfituar nga lidhjet e tij politike, të cilat ai i mohon.

Javën e kaluar në rrjete sociale, Adani uroi Trump për fitoren e tij në zgjedhje dhe u zotua të investojë 10 miliardë dollarë në SHBA. /Telegrafi/