Senatorët amerikanë duan të shfuqizojnë lehtësimet tatimore për automjetet elektrike

Një grup senatorësh republikanë ka paraqitur një projektligj për heqjen e lehtësisë tatimore prej 7500 dollarësh që aktualisht është në fuqi në SHBA për blerjen e automjeteve të reja elektrike.

Kjo është një ndihmë federale, e vlefshme në të gjithë territorin kombëtar, megjithëse secili shtet federal mund ta rrisë këtë ndihmë sipas politikave të tij.

Përveç kësaj, propozimi i senatorëve parashikon një taksë të re prej 1000 dollarësh për çdo automjet elektrik të shitur, me argumentin se këto automjete kontribuojnë në konsumimin e rrugëve dhe duhet të ndihmojnë në financimin e mirëmbajtjes së tyre.

Një nga argumentet kryesore të senatorëve që mbështesin këtë masë është se automjetet elektrike janë më të rënda se ato me motorë me djegie të brendshme, gjë që sipas tyre shkakton më shumë konsum të rrugëve dhe urave.

“Automjetet elektrike mund të peshojnë deri në tre herë më shumë se veturat me benzinë”, tha senatorja, Deb Fischer, e cila gjithashtu thekson se sistemi aktual i financimit të mirëmbajtjes së rrugëve mbështetet në taksat mbi benzinën dhe naftën.

Nismëtari i këtij plani është senatori John Barrasso, së bashku me 14 ligjvënës të tjerë. Kjo masë mund të jetë një goditje e madhe për industrinë e automjeteve elektrike.

Paradoksalisht, Elon Musk (bashkëpronari dhe drejtori i Teslës) gjithashtu mbështet heqjen e subvencioneve për makinat elektrike, të paktën në Shtetet e Bashkuara. /Telegrafi/