Selmanaj: Mos i vrisni provat, mos e vrisni të vërtetën – incizimet e Abazit të publikohen sa më parë

Deputeti i Lidhjes Demokratike të Kosovës, Driton Selmanaj, ka reaguar pas deklarimeve të deputetit të Lëvizjes Vetëvendosje, i cili të enjten tha se ekzistojnë video-incizimet ku shihet se kush i ka zhdukur mostrat e aktivistit Astrit Dehari.

Në një postim në Facebook, Selmanaj ka kërkuar që të publikohen këto incizime, ndërsa ka bërë thirrje që të mos “vriten” provat e as e vërteta.

Lexo po ashtu Zhdukja e mostrave të Astrit Deharit, Abazi kërkon që prokuroria të intervistojë Kurtin e Haxhiun

“Mos i vrisni provat, mos e vrisni të vërtetën! Duam transparencë. Duam hetim të pavarur. Fshehja nuk kalon. Mashtrimi assesi. Kërkojmë që sa më parë të publikohen incizimet e përmendura të deputetit të pushtetit, që i përmendi sot në konferencë për shtyp”, ka shkruar ai.

Tutje, deputeti i LDK-së ka thënë se incizimi i pretenduar i Abazit duhet të hetohet në mënyrë urgjente.

“Njëherit, e dënojmë fshehjen e mundur të incizimit të këtij rasti të rëndë nga ministrja e Drejtësisë. Po ashtu, e dënojmë fuqishëm heshtjen e kryeministrit për këtë ngjarje të fshehur e të tmerrshme. Populli i Kosovës duhet ta di të vërtetën! Kujtojmë se vjedhja e provave të rastit Dehari ka ndodhur në kohën kur VV është në Qeveri”. /Telegrafi/