Ronaldo: Fitorja ndaj Barcelonës i ka dhënë shtytje Juventusit

Cristiano Ronaldo ka vazhduar të shënoja gola edhe në paraqitjen e tij të 100-të me fanellën e Juventusit.

Superylli portugez realizoi dy herë nga pika e bardhë në fitoren prej 3-1 kundër Genoas, ndërsa ka thënë se triumfi ndaj Barcelonës e ka motivuar më shumë skuadrën.

“Objektivi është fitorja, gjithmonë. Ishte një ndeshje e rëndësishme, rekordet personale të kënaqin, por qëllimi janë tri pikët për skuadrën”, ka deklaruar Ronaldo për Sky Sport Italia.

Ky triumf vjen pas fitores prej 3-0 kundër Barcelonës në Ligën e Kampionëve në Camp Nou, kur edhe Bianconerët siguruan kualifikimin nga pozita e parë në grup.

Lexo po ashtu Ronaldo shënon dy herë në ndeshjen e 100-të me fanellën e Juves

“Fitorja në Barcelonë ishte shumë e rëndësishme, sepse të mposhtësh një skuadër të tillë në terren të tyre, vërtet e ngrit vetëbesimin. E pamë rezultatin sonte (e diel) këtu”.

“Objektivi i Juves secilin vit është ta fitojë Scudetton dhe Ligën e Kampionëve. Vetëm një skuadër mund ta fitojë një garë të këtillë. Ajo që mund të bëjmë ne është të besojmë dhe të ëndërrojmë për të fituar diçka të rëndësishme”, ka shtuar CR7. /Telegrafi/