Alessio Romagnoli e ka vazhduar kontratën e tij me Milanin, kanë bërë të ditur nga klubi italian.
Me kontratën e re, 23-vjeçari është lidhur me Rossonerët deri në vitin 2022, ndërsa njoftimi është bërë në formë befasie përmes një videoje të publikuar në faqen e klubit në Facebook.
Ka pasur spekulime se Juventusi i kërkonte shërbimet e mbrojtësit italian, prandaj Milani ka reaguar për t'u dhënë fund thashethemeve.
Romagnoli është produkt i Akademisë së Romës, ndërsa në San Siro u transferua në vitin 2015 për 25 milionë euro.
Ai ka luajtur edhe në formë huazimi te Sampdoria, ndërsa si lojtar profesionist te Giallorossët ka qenë në vitet 2012-2015.
(Foto: Getty Images)
Prej se iu bashkua Rossonerëve, Romagnoli ka regjistruar më shumë se 100 paraqitje për klubin kuqezi.
Nga ana tjetër, ai është përfshirë edhe në ekipin kombëtar të Italisë. /Telegrafi/
