Reshitaj: IKSHPK rekomandoi të mos mbahet asnjë tubim, as falje namazi, as dasma

Ka përfunduar takimi i anëtarëve të Komisionit për Shëndetësi dhe Mirëqenie Sociale dhe drejtorit të Institutit Kombëtar të Shëndetësisë në Kosovë, Naser Ramadani.

Në këtë takim, drejtori i IKSHPK-së, Naser Ramadani ka raportuar për gjendjen e pandemisë COVID-19, në Kosovë, transmeton Telegrafi.

Kryetarja e këtij komisioni, Albena Reshitaj, tha pas takimit se IKSHPK ka raportuar se nuk pasur përkrahje të mjaftueshme institucionale gjatë kësaj periudhe.

“Nga Instituti Kombëtar i Shëndetësisë Publikë na është thënë se nuk ka pasur shumë përkrahje institucionale gjatë kësaj periudhe, gjithashtu Kosova nuk ka pasur kapacitete të mjaftueshme të bëjë testime të mjaftueshme sidomos për të riatdhesuarit.

Gjithashtu, anëtarët e komisionit kanë shprehur një shqetësim në lidhje me ekipin mjekësore që funksionojnë në Aeroportin Ndërkombëtar të Prishtinës. Pasi që nuk dihet se kujt i raportojnë, kush i monitoron, dhe kush vendos se kush duhet të lirohet për në shtëpi”, tha ajo para mediave, përcjell Telegrafi.

Reshitaj tha se si Komision janë duke shikuar se kush monitoron këto ekipe mjekësore, pasi që atje po bëhen disa selektime se kush duhet të lirohet e kush të shkojë në karantinë.

Po ashtu, Reshitaj ka thënë se në veri nuk bëhen testime nga IKSHPK.

Ndërsa, si përfundim ajo ka thënë se IKSHPK rekomandon që të mos mbahet asnjë tubim, dasma, falje e namazit, sepse tubimet janë të rrezikshme./Telegrafi/