Reshitaj: AAK do ta votoj Projektligjin për Rimëkëmbje

Deputetja e Aleancës për Ardhmërinë e Kosovës, Albena Reshitja ka thënë se Grupi i tyre Parlamentar do të votojë Projektligjin për Rimëkëmbje Ekonomike.

Reshitaj në një konferencë për medie, i ka bërë thirrje edhe deputetëve tjerë që ta votojnë këtë Projektligj.

“Ky Projektligj e ka peshën e vet dhe i atakon të gjithë qytetarët e Kosovës, andaj ne i bëjmë thirrje të gjithë deputetëve që ti japin përkrahje këtij ligji pavarësisht vërejtjeve që mund t’i kemi. E kuptojmë drejt shqetësimin me rritje enorme të rasteve me COVID-19, por në të njëjtën kohë kërkojmë që të gjendet një zgjidhje e përshtatshme për menaxhimin e situatës dhe të mos shkohet me mbyllje totale të vendit. Apelojmë tek të gjithë qytetarët e vendit për kujdes të shtuar në respektim të masave institucionale”, tha Reshitaj.

Ndryshe, më 12 tetor, pas gjashtë dështimeve, Kuvendi i Kosovës me 64 vota për, asnjë kundër dhe asnjë abstenim, kishte votuar në lexim të parë këtë Projektligj.

Nëse Projektligji siguron votat e nevojshme edhe në lexim të dytë, kryetarja e Kuvendit e nënshkruan dhe e dërgon tek Presidenti për shpallje. Ndërkaq, Presidenti ka afat tetë ditë për ta shpallur ose për ta kthyer atë për rishqyrtim në Kuvend.

Në dispozitat e këtij Projektligji është plotësimi dhe ndryshimi e disa ligjeve, me qëllim të rimëkëmbjes së ekonomisë së Kosovës pas efekteve negative të shkaktuara nga pandemia COVID-19. Ky do të mbetet në fuqi deri më 31.12.2021. Pas kësaj date, të gjitha dispozitat e këtij Ligji do të shfuqizohen në mënyrë automatike.

Me anë të këtij Projektligji parashihet zbatimin e Pakos së Rimëkëmbjes Ekonomike në vlerë prej 365 milionë euro. /Telegrafi/