Reagon LVV: Haxhiu po i del në ndihmë presidentit kundër Vetëvendosjes

Presidenti Hashim Thaçi dhe kryetari i Lëvizjes Vetëvendosje, Albin Kurti janë takuar edhe dy herë të tjera, përveç takimit zyrtar në Presidencë për konsultimet për formimin e Qeverisë.

Kështu deklaroi opinionisti, Baton Haxhiu, në emisionin “Info Magazinë” në Klan Kosova.

Lexo po ashtu Haxhiu thotë se Thaçi e Kurti janë takuar edhe dy herë dhe kanë biseduar gjatë

Lidhur me këtë deklaratë të Haxhiut, ka reaguar Lëvizja Vetëvendosje.

Zëdhënësi i këtij subjekti, Arlind Manxhuka në një deklaratë për Telegrafin, ka thënë se “Baton Haxhiu nuk e ka thënë të vërteten”

“Baton Haxhiu po rren dhe kjo s’përbën lajm. Presidentit më në fund po ia shpjegojnë rolin e vet, që është ceremonial e formal. I zënë ngushtë në këtë pasivitet të sapozbuluar, ka mundësi t’i ketë dërguar letër Baton Haxhiut e t’i ketë kërkuar ta nxjerrë nga situata”, ka thënë Manxhuka.

Ai më tej shtoi se Baton Haxhiu është i gatshëm të gënjejë në ndihmë të presidentit Thaçi.

“Baton Haxhiu është i gatshëm të gënjejë, në ndihmë të presidentit e kundër Vetëvendosjes. Por, dhe ky është provuar që është i pafuqishëm, përballë vendosmërisë për ndryshim”, ka thënë Manxhuka për Telegrafin.

Ndryshe sot lideri i LVV-së, Albin Kurti i është përgjigjur letrës së presidentit Hashim Thaçi të cilën ky i fundit ia dërgoi më 10 janar 2020.

Kurti letrën e Thaçit e ka konsideruar si paralajmërim kërcënues. /Telegrafi/