Rashani i dhuroi fitoren e fundit Kosovës, Challandes mund ta aktivizojë nga minuta e parë: Është në formë të lartë, mund të luajë

Elbasan Rashani njihet si ‘Xhokeri’ i Kosovës, pasi çdoherë që është futur në lojë nga banka rezervë ka shënuar gol.

Rashani ka katër gola të shënuar me Kosovën, të gjithë pasi është inkuadruar nga banka rezervë.

Goli i parë i tij u shënua në barazimin 2-2 ndaj Shqipërisë në vitin 2015, ndërsa sulmuesi anësor realizoi edhe ndaj Ishujve Faroe një vit më vonë në fitoren e Kosovës 2-0 në Frankfurt.

26-vjeçari dy golat e tjerë i ka shënuar ndaj Letonisë në triumfin 4-3 të Kosovës, si dhe në ndeshjen e fundit 2-3 ndaj Bullgarisë.

Në pyetjen e Telegrafit drejtuar përzgjedhësit Bernard Challandes, nëse ka ardhur koha që Rashani të jetë nga minuta e parë apo do të preferonte përsëri si ‘xhoker’, Challandes e ka lavdëruar atë.

“Nuk e tregoj formacionin tani, por kur flasim për Rashanin, ai kishte disa ndeshje të mira në Superligën e Norvegjisë, gjë që është e mirë edhe për mua, por kur flasim për të edhe Rashicën është e vështirë t’i caktosh njërin, por ai po kalon një kohë të mirë në Norvegji”, tha Challandes.

“Ai ka treguar disa paraqitje të mira atje dhe për mua ai është një mundësi e mirë, një mundësi shumë e mirë për ndeshjen e nesërme, pasi që do të luajë me lojtarët nga krahët, pasi ai luanë në të djathtë dhe të majtë në Norvegji”.

“Skuadra e Rashanit qëndron shumë mirë në ligë, ai ka shënuar, asiston po ashtu dhe është një kandidat i mirë për të luajtur nga fillimi nesër apo për ndeshjen e radhës”, deklaroi Challandes. /Telegrafi/