Rama, Erdoganit: Nuk harrohet njohja e pavarësisë së Kosovës nga ju në minutat e para të shpalljes së saj

Kryeministri shqiptar Edi Rama ka renditur 3 aspekte kryesore, sipas tij, që populli shqiptar, Shqipëria e Kosova nuk i harrojnë dot ndaj Turqisë.

Në konferencën e përbashkët për shtyp me Presidentin Erdogan nga Turqia, Kryeministri Rama përmendi njohjen e pavarësisë së Kosovës nga Turqia, dhe ndihmën që shteti turk ofroi për Shqipërinë gjatë tërmetit vdekjeprurës të 26 Nëntorit 2019 dhe sigurimin e vaksinave gjatë pandemisë Covid-19.

E para, falë jush Kosova u njoh si republikë e pavarur pak minuta pasi parlamenti i saj shpalli Pavarësinë.

E dyta, kur Shqipëria u godit nga një tërmet me pasoja jashtëzakonisht të rënda, ju ishit i pari që komunikuat me mua, më thatë që sa të jetë Turqia, Shqipëria nuk do jetë kurrë vetëm dhe ndërmorët iniciativë publike për fillimin e ndërtimit të 500 apartamenteve të reja.

E treta, kur Shqipëria bashkë me popujt e tjerë të rajonit tonë u ndjenë si peshku pa ujë në momentin kur bota u godit nga coronavirusi, dhe teksa shikonim nëpër ekranet e televizioneve europiane fillimin e vaksinimit në Europë, nëse nuk do ishte Turqia dhe nëse nuk do ishit ju personalisht kush e di se sa njerëz do kishin humbur jetën. Dhe këto janë 3 momente mes jetës dhe vdekjes që nuk harrohen dot kurrë”, u shpreh Kryeministri Edi Rama./Tv Klan