QKMF në Pejë aksion për dhurimin e gjakut: Pjesëmarrje e ulët e vullnetarëve

Qendra Kryesore e Mjekësisë Familjare në Pejë ka organizuar një aksion për dhurimin e gjakut, në bashkëpunim me Qendrën Kombëtare të Transfuzionit të Gjakut.

Ky aksion ka për qëllim të ndihmojë në përmbushjen e nevojave për gjak, përmes angazhimit të vullnetarëve.

Drejtoresha e QKMF-së, Arjeta Musliqi, në një deklaratë për Telegrafin, theksoi rëndësinë e këtyre aksioneve dhe vuri në dukje që janë mirëpritur nga komuniteti.

Ajo shtoi se aksioni i fundit ishte i planifikuar prej dy javësh, duke njoftuar në kohë për ardhjen e Qendrës Kombëtare të Transfuzionit të Gjakut për të mbledhur gjak nga dhuruesit potencialë.

“Para dy javësh janë lajmëruar që do të ketë një vizitë nga Qendra Kombëtare e Transfuzionit të Gjakut që do të organizohet në QKMF, për vullnetarët shëndetësorë si dhe qytetarët”, ka thënë Musliqi.

Megjithatë, sipas saj, numri i dhuruesve ka qenë më i ulët se sa pritej, edhe pse njoftimi është bërë me kohë.

Musliqi theksoi se faktorë të jashtëm, si kushtet atmosferike dhe virozat sezonale, kanë ndikuar në pjesëmarrjen e ulët.

“Lajmërimi është bërë me kohë, nuk kemi fluks të madh. Ndoshta ka ndikuar koha edhe ftohjet që janë indikacione që nuk duhet pacienti të japë gjak. Ka pasur disa që kanë shprehur interesimin, por për shkak të gjendjes së tyre shëndetësore nuk u është lejuar dhurimi i gjakut”, ka përfunduar ajo.

Ky aksion ka filluar në mëngjesin e të mërkurës nga ora 10:00 dhe ka përfunduar në orën 14:00. /Telegrafi/